Mizoram sorkar Food Civil Supplies &Consumer Affairs Minister Pu H Rohluna chuan vawiin chawhnu khan tualchhung thuthar lakhawm tute a pisa ah leng a sawmin tunlai Mizoram chhunga buhfai, eirawngbawlna gas leh oil hrang hrang lakluh kawnga dinhmun thar lam ber ber a hrilhfiah.

Minister chuan heng nitin mamawh te hi Mizoram chhungah hnianghnar taka lakluh a nih theihlohna chhan hrang hrang tarlangin chutih lai a Mizoram sorkar in mipuite harsatna hria a theihtawp a chhuah thin dan te hi mipui mimir pawhin hrethiam thin se a beisei thu a sawi a ni. Harsatna a tarlan zingah ruahtui tlak tam lutuk avangte, inkawlpawhna kawng a pin thin thu te leh a bikin Bairabi leh Kolasib inkar kawng PWD ten theihtawp an chhuah chunga leihlawn derthawn deuh vang te, Bairabi Rail Head a Weight Bridge siam that mek chu cement hna a nih avanga duhthusam a chak a thawh theih a nih loh dan te, Bairabi Rail Head a buhfai thiar tur indaih tawk loh vangte a nih thu Minister hian a tlangpuiin a tarlang a. Hetih lai hian harsatna hrang hrang sawiho turin FCI chuan Guwahati ah inkhawm a ko mek a hetah hian tunhnai a Mizoram dinhmun rawn thlithlai tu FCI Regional Office a an General Manager B.Prakashan leh Mizoram sorkar mipawimawhte pawh an zuk tel dawn a ni a ti a.

Hnathawk tu indaihlohna avanga harsatna an tawh te Minister hian tarlangin Borkhola atanga Mizoram tana Gas trip khat dang rawn thawn belh tur a tih pawh thla kalta chhunga Idd hman a nih avangin Truck Driver an indaihloh a, Trip 9 lo thleng turah Trip 7 chauh kan hmuh theih phah a ni, Minister chuan a ti a. Bairabi leh Mualkhang Bottling Plant tih len tum mek a nih thu sawiin, Mualkhang bikah ram mamawh belh a nih thu leh  mimal LSC nei an lo awm hlauh avangin harsatna dang a piang leh ta rih a ni  tiin Minister chuan chanchinbumi te hi a hrilh a ni.

Oil chungchang bik a sawina ah Minister chuan Sairang a Oil pek chhuahna tur lian tham tak ruahman mekah Rail Station atanga Km 100 bial vel tal a dah a ngaih thu  leh tun dinhmun a Rail Station hmun siamna tur tihfel a la nih loh vanga duh ang a chaka hma lak a nih theihloh thu te, tun dinhmunah chuan rikrum thulhah pawh thlakhat chhung tal tla tur Oil dahkhawmna ruahman hi kan tum ber a ni a ti.

FCS&CA Minister hian Mizoram harsatna te buaipui a tunhnai a a zin chhuahna hrang hrang a tarlang bawk a. Heng a zinna te hian rah a chhuah ve mek bawk a ni a ti a.Ramnagar atanga load tipung tura a ngenna pawh hlawhtlingin nimin mai ah pawh buhfai Trip 30 lai an lo thawn thu Minister hian a tarlang bawk.