Vawiin khan Champhai DC Conference Hall-ah Champhai a Sorkar Office hrang hrang hotutechuan chhiatrupna thlen thulha an department-te theuh thawh tur leh inpuahchahna te Champhai DC Pu Vanlalngaihsaka khaihruaiin sawihona an neia. He hun hi Disaster Management and Rehabilitation Principal Secretary Pu Lawmsanga, IPS ; DM&R Director Pu Pu C. Lalpeksanga; Pi Zosangzuali Pachuau, Deputy Director, DM&R; leh State Disaster Management Authority a Member, hetiang lamah thiamna nei Pu Dominic Lalhmangaiha ten he hun hi an hmanpui a ni.

Principal Secretary Pu Lawmsanga chuan District level mai bakah Office tinte chuan disaster management chungchangah hian anmahni plan theuh an siam tur a nih thu a sawi a. Department hrang hrang inkarah thawhhona tha neih a pawimawh thu leh, mahni chanpual theuh te hriatchian a tul thu a sawi a. Chhiatna alo thlenin mi zawng zawngin DC office-ah inpum nghah chu thil theihloh a nih thu leh, department tinte chuan anmahni inralrin ve theih dan tur leh hmalak dan turte chiang taka an ngaihtuah chu a tul thu a sawi a. Mipuite ah pawh kan ram leh lo ah te hian insurance tih nachang kam hriat a pawimawh thu a sawi a. Neih thinglungkhawnga meuhva kan in sak te hi kan lo insure siloh chuan chhiatna lo thlengin, lo chhe ta vek se, in han din that leh chu thil huphurhawm duh tak a ni dawn a ni, a ti.

Pu C. Lalpeksanga chuan Plan siam mai chu thil harsa nilo mahse hman tangkai tak tak theih tur siam ngei a pawimawh thu leh kum tih chung plan te chu update zel theih ni se a tih thu a tarlang a. Chhiatrupna hi kan insawithaih a nilova, kan inrin lawk thei nan inpuahchah leh ruahmanna tha neih a tul zia inhrilhhriat a pawimawh a ni, a ti a. Chhiatrupna a thlen thulha an inpuahchahna turah CSS Scheme nei Department te chu an Budget atanga za zela sawm chu Disaster Fund atana hman theih tura dah turin ruahmanna siam a ni tawh thu a tarlang bawk.

Vawiin meeting-ah hian District Disaster Management Authority leh District Disaster Management Committee a member-te bakah Incidence Response System hnuaia mawhphurhna hrang hrang chelhtu an tel a. Mahni Department theuh mawhphurhnate leh plan siam tura hmalakna te sawiho a ni.