Ni hnih awh tur State Level Legal Awareness Workshop on Women related Laws chu Mizoram State Commission for Women (MSCW) Chairperson Pi C. Lalawmpuii'n Champhai I&PR Auditorium-ah vawiin khan a hawng. He workshop hi Sorkar laipuia National Commission for Women bultum niin, Mizoramah chuan Govt. Mizoram Law College-in a huaihawt a ni.

Pi C. Lalawmpuii chuan Mizo hmeichhiate chu hnam dang tam tak ngaihtuah chuan society-a an dinhmun chuan ziaawm a pan zel thu leh, inneih leh inthen nikhua a hmeichhiate humhalh tur The Mizoram Marriage, Divorce and Inheritance of Property Bill pass a ni te chu State dangte pawhin an awt ve em em thu a sawi a. Chutihrual chuan tumah kan dinhmun a inan vekloh avangin hmeichhiate humhim thei tur Dan tha tak tak kan nei chunga hriatloh avanga harsatna tawk tam tak an la awm thin thu te, kan society kalphung hrim hrimah hlawhtlinna kawng pawh ni se hmeichhiate tan chuan lang si lovah harsatna tam tak a la awm thu te a tarlang a. Hengah hian mipa el tumna rilru nilovin, hmeichhiate chanvo leh dikna te inhrilhriat a pawimawh zawk thu a tarlang a. Chhungkaw inrelbawlna tha nei tura hmeichhiate paimawhzia sawi telin, kalkhawmte chuan workshop chu tangkai taka hmang turin a chah a ni.

Champhai DC Pu Vanlalngaihsaka pawhin thu sawiin, hmeichhiate humhalhtu tur Dan hrang hrangte inhrilhrhiatna hun siam a ni chu lawmawm a tih thu leh, heng Dan te hi hmeichhiate hriat atan mai nilovin mipate pawhin hre tlang ve vek se a hlawhtlinna a zual ngei ang, a ti a. Vawiina kalkhawmte chu ngaithla liamtu ni mai lova pudarhtu tha tak ni thei turin hlawkthlak taka hmang turin a sawm a ni.

Vawiin hun hi Dr. Rualkhuma Colney, Principal, Govt. Mizoram Law College chuan kaihruaiin, Dan hriat hi huaisenna a nih thu a sawi a, chutihrual chuan hr eve deuh hre ziktluaklo nih a hlauhawm avangin workshop chu hmang tangkai a, hriatthiamloh awmte pawh zawt hrehlo turin participant-te chu a sawm a ni. Pi Rebecca Lalrindiki, Asst. Professor, Govt. Mizoram Law College leh he programme Co-ordinator ni bawk chuan report pe in, workshop hi kalpui tura hmalak dan tlangpui a sawi a. A vawi khatna atan National Commission for Women chuan State chhunga hmun thumah Workshop hi nei tura a rawn phut hnuah Kolasib leh Serchhip leh Champhai chu thlan niin, Champhai hi a tawpna ber tur a ni.

Dan in hmeichhiate thlavang hauhna Dan hrang hrangte inhrilhhriatna hunah hian District chhunga NGO hrang hrang te bakah College naupangte leh zirtirtute te tel tura sawm an ni a. Ni hnih chhung hian Dan lama mithiam leh thawk mek mi paruk hovin topic pawimawh tak tak ngaihthlak leh sawihona neih a ni dawn a ni.

Attachment

  • Loading attachment...