Vawiin khan Lawngtlai DC Conference Hall ah Lawngtlai District Disaster Management Committee te chuan meeting an nei a, Disaster Management and Rehabilitation Minister Pu C. Ngunlianchunga’n a telpui.

Minister hian DM & R hmalak mek hrang hrang te tarlangin Lawngtlai District mai ni lo, Mizoram pum tana kan tangkai pui tur ruahmanna awm mekte a sawi lang a, Lawngtlai District in tuna harsatna a tawh mek pawh Consultancy Firm naktukah Lawngtlai-ah rawn thlengin a hmunah an en nghal dawn a, hma lak dan tur ruahmanna tha tak an siam nghal dawn a ni a ti. Hei bakah hian Mizoram chhung hmun hrang hrang a lei tlahniam leh leimin hlauhawm zual Saiha New Colony, Sangau, Champhai leimin te leh hmun dang dang te pawh Consultancy Firm te nen hian en ho a ni nghal dawn a ni a ti bawk. Tunah hian Ramhlun Sport Complex lei tlahniam venna tur pawh core 21 senga sak mek a ni a, Laipuitlang chhiatna singsak felna hna pawh nuai 45 senga thawh niin Thakthing veng cheibawlna hna pawh thawh mek a ni, a ti bawk.

Hengte bakah hian Tlawnglui leh lui danga tuitla tamna bik hmun thenkhatah tuitla ruang zawng te innghahkhawmna tur leh chawlh hahdamna tur In sakna tur ruahmanna kalpui mek a nih thu a sawi a, ruang zawnna a Ngar kan hem thin pawh tha leh thing leh mau tam tak kan hman thin avangin Ngar hem ngai lova hman theih tur chi Net ngaihtuah mek a ni a ti. Minister chuan kum 1995 ah Lawngtlai khawpuiin leimin rapthlak tak kan tawk a, kha mi tumah khan veng leh veng pawh kan in kalpawh thei lova khawi veng tan mah damdawiin pan theih lah a ni hek lo, khatiang chhiatna emaw lirnghing nasa deuh te kan khawpui ten lo tawk palh ta se damdawiin pan mai a harsa hle dawn a ni tih a takin Lawngtlai in a tawng tawh a, khatiang hun thlen thulha tha taka hmachhawn thei turin DM&R chuan khawpui hrang hrang a hmun thlan bikah First Aid Centre siam tumin hma a la mek a ni, a ti.

Lawngtlai District Disaster Management Authority Chairman Pu J. Hmingthanmawia, Lawngtlai Bawrhsap ni bawk hova meeting ah hian Lawngtlai District DM&R hnuaia Team Of Officers ten Lawngtlai khawpui chhung hmun hrang hrang fang kuala chhiatna thlen hlauhawmna hmun an tlawh atanga report an siam bawhzui dan tur ngaihtuah ho a ni a. Bazar area-a lei tlahniam te, Lawngtlai III a lei tlahniam leh Salem Branch YLA te Hall sakna tur laih tuna min hlauhawm taka awm mekte enkawl dan tur bakah Chhimtuipuia tuitla an awm changa a zawn hna hmanraw tha zawk nena thawh dan turte an ngaihtuah hova, Lawngtlai khawpui chhunga mockdrill neih ve dan tur te pawh an sawi ho bawk.