Serchhip 11.08.2014: Vawiin chawhma dar 10:30 atang khan DC Office, Serchhip-ah ni thum chhung awh tur, Serchhip District chhunga PMEGP – Margin Money Scheme hnuaia loan lak ditute tan personal interview neih tan a ni. He interview hi District Level Task Force Committee Chairman, Pi Juhi Mukherjee, IAS kaihhruainaa neih a ni a, Implementing Agency KVIC/KVIB leh DIC bakah bank manager te leh khawtlang hruaitu, Village Council aiawh ten uluk takin interview hi an neihpui a ni.

Serchhip District chhungah hian loan diltu hi KVIC-ah 65, KVIB-ah 285 leh DIC-ah 70, an zavaiin mi 320 an awm a, vawiin hian Serchhip khawpui pawn lam atanga diltute koh hmasak niin, naktuk leh naktip hian khawpui chhung atanga diltute interview an ni ve leh ang. Serchhip District chhunga PMEGP loan dilte tan hian cheng nuai 158.27 dah a ni a, heng pawisa te hi trade hrang hranga mi rintlak, dinchhuahpui ngei tura beiseiawm thlanchhuah mi 133 te hnenah puktir an ni dawn a ni.