Vawiin khan Aizawl Vanapa Hall-ah Aizawl khawpui chhunga Self Help Group (SHG)-te kohkhawm niin chak lehzuala heng group-te’n hma an sawn theihna turin ‘Sensitization & Awareness of Self Help Group under National Urban Livelihood Mission’ chu neih a ni a. He programme-ah hian UD&PA Minister Pu Zodintluanga chuan Self Help Group 284 hnenah revolving fund cheng 21,000 theuh a sem.
Pu Zodintluanga chuan UD&PA kaltlanga Mizoram khawpui tihhmasawnna tur hmalakna hrang hrang a tarlang a. Chung zingah chuan Urban Development kaltlanga Mizoram District khawpui hrang hrang cheimawi hna te, khawpui chhung inkalpawhna kawngpui siamthat hna te, MZU panna kawngpui tha tak siam hna thawh mek te, Lungleia Convention Centre sak mek te, Champhai leh Lungleia Athletic Track awm tel Stadium puitling sak hnathawh mek te, hmarchhak state dangte nena khaikhin pawha chhuanawm tham Serchhipa hall lian tak sak mekte chu a langsar zual a ni, a ti.
UD&PA Minister chuan retheite chawikan hna pawh he department hian a thawh nasat hle thu sawiin, chenna tur in tha nei zo lo District khawpui hrang hranga cheng mirethei chhungkaw sang tam takte chenna tur in sak zawh tawh a ni a, RAY kaltlangin miretheiten chenna in tha an neih theih nan project duan thar a ni, a ti. Kum 2009 atanga 2013 thleng khan he department kaltlang hian chhungkaw 1,78,134 (nuai khat singsarih sangriat za sawmthum pali) hnenah tanpuina sum cheng nuai 2368.77 sem a ni tawh, a ti bawk.
Minister chuan khawpui chhunga miretheite chawikan nana hmalakna pawimawh leh tangkai tak SJSRY tih thin chu kum kalta khan National Urban Livelihood Mission (NULM) tia thlak niin India ram pumpui ngaihtuaha miretheite chawikan nan he scheme thar hmang hian hma lak chhoh mek a ni, a ti. He scheme thar hnuaia hmalakna pui ber chu SHG niin group tinte nghet tak leh pheikhai rual taka hma la tlang tur leh mahni leh midang rintawkna nei a, sum khawlkhawm thiamna te, pawl lungrualna leh hmasawnna a huhova ngaihtuah a, sum leh pai eizawnna hnianghnar zawk neih piah lamah mahni leh midangte khawsak phung a tha zawnga hmasawnna thlen turin tan la lehzual sauh sauh turin kalkhawm te a fuih a. Mizo nunze mawi, tlawmngaihna te, rinawmna te leh taimakna nen theihtawp chhuaha hma an lak phawt chuan sorkar tanpuina nen an hlawhtlin ngei a beisei tlat thu leh sum peipun tur (revolving fund) an dawn pawh member-te’n insem darh leh pûk ral mai lova Group hmasawn nana tangkai taka hmang ngei turin a chah a ni.
UD&PA Department hian kawng hrang hrangin khawpui hmasawnna tur a thawk a, khawpui a cheng BPL te hmasawnna tur ah pawh hma lak chhoh mek zel a ni. NULM hnuaia SHG te hi member 10-20 zel inhlawmkhawm an ni tur a ni a, member za a 70 te hi BPL chhungkua ami an ni ngei tur a ni. District Headquarters tinah he hmalakna hi kalpui niin Aizawl bikah SHG 478 din a ni tawh a. Vawiin khan a thawhkhatnaah Group 284 te hnenah revolving fund pek phawt niin la sem chhunzawm zel tum a ni. He revolving fund sem hi group tin tena bul an lo tan nan leh hma an lak theih nana tih a ni.
Sensitization & Awareness of Self Help Group under National Livelihood Mission programme hi UD&PA Director Pu Zorammuana’n a kaihruai a, NULM Project Director Pu HVL Zarzoenga’n NULM nihphung a sawi bakah Pu Vanlalmawia, Joint Director, UD&PA-in kalkhawmte hnenah lawmthu a sawi a ni.
