DM&R Minister Pu C.Ngunlianchunga chuan vawiin chawhnu dar 1:00 khan DM&R Directorate Office ah chhiatna lo thlen thulha chhanchhuahna hmanrua chi hrang hrang te Mizoram District hrang hranga District Emergency Operation Centre (DEOC) leh State Disaster Response Force (SDRF) te hnenah a sem.

Minister chuan thutawi sawiin khawvel changkang chho zelah chhanchhuahna hmanrua tha zawk kan neih theih nan Disaster Management & Rehabilitation (DM&R) Department chuan theihtawpin hma a la mek a ni, a ti a. Chhiatna lo thlena a tul anga chhanchhuah hna thawk turin mi engemaw zat hnenah training pek an nih tawh thu a tarlang bawk. Vawiina chhanchhuahna hmanrua chi hrang hrang sem dawngtu te chu neitu rilru pu chunga uluk taka vawng tha turin a chah bawk. Sum tam tak senga hmanrua pek te chu vawn that a nih loh chuan reilo te ah hman tlak loh ah a chan mai theih thu hriain a enkawl hna chu an mawh a nih tur thu a hrilhfiah bawk.

Vawiina chhanchhuahna hmanrua sem te hi - tuboh, hliam zawn na (stretcher), pelican light, lawng (inflatable boat), tuiluhna hmanrua (diving gear), breathing air compressor, extension cord, life jacket te a ni a, Aizawl, Lunglei, Saiha, Kolasib leh Lawngtlai DEOC te hnenah leh 1st MAP, 2nd MAP, 3rd MAP, 1st IR, 2nd IR, 4th IR, 5th IR, CYMA SDRF te hnenah hlan an ni.

Vawiina chhanchhuahna hmanrua semna ah hian DM&R Special Secretary Dr Lalrozama, IAS, DM&R Director Pu C.Lalpeksanga leh department officer te an tel a ni.