Mizoram sorkar leh UNO thawh dunna thuthlung kalpui mekah International Labour Organization(ILO)hmalakna in ILO flagship programme, Start and Improve Your own Business(SIYB) hmanga eizawnna hna peng hrang hrang thawktu te tan sumdawnna bul tan dan leh tihlen dan kawng kawh hmuh turin ni 10 awh tur“Training of Trainers” workshop chu Aizawl ITI complex ah neih mek a ni a. India rama pioneer master trainer 2 tiamin master trainer 7 ten district hrang hrang atanga ITI instructor mi 40 te chu SIYB atan hian training an neihpui mek a ni.

SIYB hi khawvel ram 110 ah kalpui mek niin ram hmasawn mek te tan ram chhunga hnathawh tur tih pun nan leh ram dinhmun siam nan a tangkai hle a. China ah chuan hnathawktu mi maktaduai 4.5 hnena hetiang training pek hian nasa takin an ram economy thanna leh hmasawnna a thlen niin hriat a ni a. Tun tuma ILO in Mizorama traning a buatsaih hi India hmarchhak biala a vawi khatna niin ar, vawk leh bawng vulh bakah puantah leh industry tenau hmanga eizawngtu ten sumdawnna bul an tan dan tur leh an tihlen chhoh zelna tura anmahni training pe chhawng turin buatsaih a ni.

Training of Trainers workshop atan hian ILO chuan Labour & Employment department te rawn thawhpuiin August ni 17 khan tan a ni a. Training kalpui dan enfiahin vawiin khan NLUP Implementing Board Vice Chairman Pu P.L.Thanga chuan ITI hi tlawhin SIYB thil tum leh UN-Mizoram sorkar thawh hona hnuaia hmalak chhoh mekte sawiin trainers te fuihna hun a hmang a ni.