No.5916/2020-2021

Aizawl, the 9th Oct, 2020: Tukin zing kar khan Pu Lalchamliana, DM&R Minister chuan tunhnaia ruahsur nasa vanga Hunthar, Chanmari West leh Vaivakawn veng hmun thenkhata lei tlahniam thar te a hmunah a tlawh a. Helai hmun venhimna atan leh NH-54 dawlna hna thawh kal lai mek te a endik. DM&R Minister hi Pu Lalruatkima Minister, Pu C. Lalmuanpuia, MLA Aizawl North-III ten an tawiawm a ni.

DM&R Minister chuan Hunthar Veng huamchhunga NH-54 lei tlahniam a endik pah hian he lai area dawlna atana Mizoram State sum Rs. 500 lakh chuang senga PWD (Highway) hna thawh mek te chu a bialtu Engineer te a sawipui a. Hna thawktute chu theihtawp chhuah zel tur te, tha tak leh rang zawka thawk turin a chah a. Hemi hnuah hian Vaivakawn atanga Chanmari West panna kawng tlahniam te en lehin a siamthat hna thawk mektu PWD te ruahmanna ngaithlain a hma lak zel dan tur a sawipui a, lei tlahniam leh tawlh venna atana geologist te thurawn a sawi pui bawk a ni.

DM&R Minister Pu Lalchamliana chuan Chief Minister pawhin helai huamchhunga mipuite harsatna tawh hi a hre reng a, helai hmun lo tlawh tur hian CM nen an sawi dunna atanga hma la a nih thu a sawi a. Lei tlahniam avanga innleh hmunhma chante a tawrhpui tih sawi langin amah tawiawmtu Minister Pu Ruatkima leh bialtu MLA Pu Muanpuia te nen pawh CM an sawi pui leh dawn a ni, a ti a. NDMA atangin mithiam pahnih Oct ni 26 ah helai hmun en tur hian an rawn kal dawn tih a sawi a. Khawtlang hruaitute pawh central mithiamte tha taka lo thawhpui tura ngenin Sorkar hmalakna turah te khawtlang thlawpna an mamawh zel dawn tih a sawi a ni. DM&R Minister chuan in thiah tur te leh kawng siam that hna thawh chungchangah a thawktu PWD te pawh chak taka hma la a, mamawh belh awm te Sorkara thlen thuai thuai turin a ngen a, working season chhungin chak thei ang bera hma la turin thawktute a chah a ni.

Pu Lalruatkima, Minister of State, Rural Development etc., pawhin thu sawiin, helai bawr tlahniam thawm thatna tur hian Sorkar leh khawtlang thawhhona tha a pawimawh hle a ni a ti a. Official te an thawkrim em em tih a hriatpui thu sawiin an tui lakna siam that kawnga PHED hmalaknaah pawh an lawm thu a sawi a ni. Hmalam hun zelah hmun him lo laiah in hmun pe chhuak lo turin khawtlang hruaituten rilru nghet tak pu in fimkhur zel se a duh thu a sawi bawk a ni.

Hunthar veng huamchhunga lei tlahniam siam thatna atan hian DM & R department hnuaiah ruahmanna siamin NDMA kaltlangin pawisa Rs. 10 cr vel rawn pek a ni a. Tunah hian hna hi thawh reng niin COVID-19 leh fur ruahsur hian nasa takin hna a ti khaihlak tih a hna thawk mektu ten an sawi a. Tun hnaia helai bawr chet leh avang hian in 27 vel bawr chu thiah tura tih niin PWD (Building) lamin estimate siamin DC, Aizawl/Chairman, DDMA hnenah an thehlut tawh a. DC, Aizawl hian sanction dilin DM&R department lamah a thehlut ve tawh bawk a ni. DC / DDMA, Aizawl hnuaiah Chanmari West kawng chung vela in leh lo te tui chhe luanna tha zawk siam tumin hma lak mek a ni bawk a ni.

Hunthar leh a chhehvel lei tlahniam leh hnathawh mek endiknaah hian Aizawl District Bawrhsap Pu R.Lalramnghaka leh Aizawl SP Pu C.Lalruaia bakah DM&R, G&MR, PWD (Highway), PWD (Roads), PHE department atang te in Official pawimawhte an tel a. Heng veng pathuma khawtlang hruaitute pawh an tel bawk a ni.