Tukin zing kar khan Disaster Management & Rehabilitation Minister Pu Nihar Kanti Chakma chuan Laipuitlang leh Ramhlun Venglai-a leimin rapthlak tak thlenna hmun thenfai leh senghawi chhunzawm zel dan tur a hmunah a en. Pu Nihar Kanti Chakma hi DM&R Jt. Director Pu Lalhmunsanga, Addl. DC Pu Hmingthanmawia leh DDMA Zone-7 bialtu Pi H Lalchhandami te’n an tawiawm a ni.

Thla liam ta May ni 11 a Laipuitlang leimin hmunhma chu thenfai leh bungraw lak theih ang ang te senghawi hna thawh mek zel a ni a. Local Council leh khawtlang hruaitute kaihhruaiin JCB leh Truck hmanga hna hi thawh chhunzawm reng a ni. Leiminin a chhilh Laipuitlang Presbyterian Kohhran Jubilee Hall leh a bula mimal in thenkhat te erawh chu an dinhmun a zirin khawl leh mihring tha hmanga ngampa taka kutthlak hleih theih nia a la lan rih loh avangin bungrua pawh thiar chhuah a la ni lo. Engtia hma lak zel tur nge tih enfiahin DM&R Minister chuan tukin zing khan helai hmun hi a tlawh a. PWD Engineer-te, Zonal Officer te leh Local Council te nen a hmun hma uluk zawka ena, sum senso ngai tur te chhut a, a rang lama Aizawl DC office hriattir ni se, a rang thei ang bera bawhzui nghal ni se tiin an rel a ni.

Tukin zing vek khan Pu Nihar Kanti Chakma hian Chanmari-Chaltlang kawng chhak lam min fo thin pawh a en a. Aizawl DC kaihhruaina hnuaia din Aizawl District Disaster Management Authority hma lakna in kar hmasa khan lung tla leh mai tur ven nan thirlen zar a ni. He thirlen zar hi Angle Iron Feet 3-a sei a kilh beh vek a ni bawk.