Mizote Zofate zinga Everest tlang lawn chhuaktu hmasa ber David Zohmangaiha leh Base Camp Manager Vanlalliana te chu Mizoram Sports Directorate chuan anmahni chawimawina leh lawmpuina hun vawiin khan an office-ah an hmang.

Directorate Coaches’ Room-a inkhawm buatsaihah hian Sports & Youth Services Director Pu Lalzirmawia Chhangte chuan David Zohmangaiha leh Vanlalliana te hlawhtlinna hian Mizo thalaite thinlungah thu namen lovin a sawi tawh a, a sawi zui zel bawk ang, a ti. Everest tlang chhip chuang tura taimakna, huaisenna, tumruhna leh chhelna an neih hi zofate hian ngaisang a, eng kawngah pawh hlawhtling tur chuan heng mite pahnih neih ang inpekna hi a pawimawh ber a ni, a ti.

David Zohmangaiha chuan tun tuma an tlang lawn hautakzia leh thi lo a ruanga a hlen theih dan tlangpui a sawi a. Kum 2003 lam daih atanga Everest tlang lawn tura a lo sual ve thin dan te, tlanglawn zir dan a bulthum atanga zawh a course chi hrang hrang a hlen hnuah 2009 khan Pre-Everest Expedition nei tur zingah thlan ve a nih thu leh sum senso tur a hautak em avanga khatih hunlaia Sports Director Pu Zoliana Royte a pan thu te a sawi a. Chutianga sorkar atanga chhawmdawlna a dawn chhoh zel avanga lawmthu sawiin tuna Sports Director Pu Lalzirmawia Chhangte puihna leh Mizoram sorkar tanpuina nen Ist N.E Mt. Everest Expedition Team ah telin thla hlui May ni 18 zing dar 5:30 ah khawvel tlang sang ber chhip a chuang ta a ni, a ti. Base Camp Manager Pu Vanlalliana pawhin tlang lawn hrim hrim hautakzia leh inbuatsaihna namenlo a tul dan te, Everest a lawn hi mi nazawng tana tih ve chi a nih loh thu leh tehna hrang hrang paltlang tur tam tak a awm dan te sawiin amah ngei pawh

Base Camp Manager mawhphurhna pek a nih danah hun harsa leh sual chhuah tur thahnem tak a paltlang thu leh Base Camp Manager a nih anga a mawhphurhna sanzia te a sawi a. David Zohmangaiha thawhrimna leh tumruhna chhuanawm a tih thu uar takin a sawi lang bawk.

Directorate of Sports &Youth Services hnuaia Adventure Wing hian Adventure Activities chi hrang hrang a neihte zinga pakhat chu Mountaineering hi a ni a. Basic Mountaineering, Advance Mountaineering, Search & Rescue Course, Method of Instruction Course (Mountaineering) training turin Mizo thalai tam tak a tirchhuak tawh a. Indian Mountaineering Foundation (IMF), India rama tlanglawn lama thuneihna sang ber hnenah pawh Mizoram Alpine Club hmingin affiliation pawh neih tawh a ni.

Sports & Youth Services Department hian Mountaineering lamah theih tawpa hma la chhunzawm zelin tlanglawn lama tui mi te State dang Mountaineering Expedition a tel thei te chu a sponsor zel a. Nikumah pawh khan White Neddle Peak, Mt. Gorichen a lawn tur te a sponsor tawh a, June 2013-a Mountaineering Expedition nei tur (Mt Thelu leh Mt. Saiffee-a lawn tur)-te pawh a sponsor leh mek bawk a ni.

Vawiin inkhawmah hian Sports Director hian lawmpuina thilpek a hlan ve ve a ni.