Vawiin chawhma khan 5th Battalion I.R. Headquarters, Sakawrtuichhun ah Disaster Management & Rehabilitation Department(DM&R) in State Disaster response Force tana Traning a buatsaih, tha taka training chhuakte Passing Out Ceremony chu DM&R Minister Pu C.Ngunlianchunga’n a hmanpui a. Traning chhuak ta te hian inchim atanga hliamtuar thiar chhuah hna thawhdan te leh hliamtuarte emergency medical treatment pek dan te bakah mipui chiai tur thunun dan te lemchan hmangin an pholang nghal a ni.
DM&R Minister chuan Mizoram leilung leh a awmna lai te chu chhiatrupna chi hrang hrang : lirnghing, kangmei, leimin, thlipui leh thil dang lakah te hmundang aiin a himlo niin mithiam ten an sawi thin a. Kan fimlkhur thiam a tul a, mitin mai hian khuarel chhiatrupna lo thleng thei kawng hrangte hi kan hriatchian a, chung dinhmun ah chuan engtia hmalak tur nge tih te chiang taka kan hriat a ngai a ni a ti. Home Department leh a hnuaia Police leh Armed force hrang hrang te inpekna te leh YMA hmalakna ah te DM&R chu a lawmthu sawi a, Mizoram mipuite tan DM&R chu thawhpui chhunzawm zel turin a ngen a ni. SDRF traning chhuak ta te chuan thianchhan thihngam thinlung leh Mizo tlawmngaihna nunpui chungin an hna chu thawk turin a fuih a. Tha taka chhanchhuah hna an thawhzel theihnan an hriselna te an vawt that tlat a ngai a ni a ti. Laipung Tlang leimin ah khan SDRF te tangkaizia kan hretlang a, an ni hi chhanchhuah hna ah chuan traning thatak nei tawh te an nih a vangin mipui leh tlawmngai te pawn a tul hunah chuan hma hruai tura kan ken hmasak te pawh a tha ang a ti a. SDRF din a nih hma zawng leh tunthleng pawha hmahruaitu, YMA te tangkaina leh thawhlawkzia hi sawrkarin a hmuh hmaih la ni a ti a. An veng chhungah theuhvah first Responder an nih avangin YMA member-te tan Training buatsaih sak tura hmalak a ni ang a ti a. SDRF-te leh chhanchhuah hna thawktu te chu Sawrkarin an mamawh bungrua leh hmanrua ten changtlung zawka thuam zel a tum a, mipui zirtir nan mockdrill te pawh tam zawka kal chhoh pui tum a ni a ti.
Ni 28 awh training ah hian 1st Battalion M.A.P. leh 4th Battalion I.R., Luangpawl a sipai 30 ve ve ten chhiatrupna thlenna hmuna vanduaina tawk te leh hliamtuarte chhanchhuah dan kawng hrang hrang 1st Battalion N.D.R.F., Guwahati a mi leh sate hnen atangin an zir a ni. Vawiin a traning chhuakta te hi batch 11-na ni tawh in batch hmasa ber chuan May 24, 2010 khan CTI Sesawngah Traning an lo tan tawh a. Batch khat ah mi 60 zel traning pek niin tunah hian Mizoram chhungah SDRF traning chhuak tawh sipai 602 an awm mek a ni.
Vawiin SDRF traning passing out ceremony hi DM&R Director Pu C. Lalpeksanga’n a kaihruaia, NDRF Inspector Pu Dharmendra Pandey-an traning chhunga zirtirna an pek hrang hrang te tarlangin Trainee zinga tithazual thlan chhuah 3 te hnenah Minister chuan lawmman a hlan a ni. He hunah hian Police hotulu-te leh sawrkar mipawimawh te an tel a ni.
