1151/2025-2026

Aizawl dated 11^th July 2025: Vawiin chhun khan Directorate of Disaster Management and Rehabilitation Conference Hall, Chawnpuiah Disaster Management and Rehabilitation Department hmalaknain khuarel chhiatna a lo thlen thulh a hman tur, inchhanchhuahna hmanrua chi hrang hrang sem chhuahna hun chu Prof. Lalnilawma, Minister, Disaster Management & Rehabilitation chuan a hmanpui a. Pi K.Lalrinzuali, Secretary, DM&R chuan kalkhawmte lawmna thu sawiin inchhanchhuahna hmanrua chi hrang hrang neih a nih theih nana hmalakna kalpui dan a tarlang a. Pu R.Vanrengpuia, Director, DM&R chuan he hun hi a kaihruai a ni.

Prof. Lalnilawma chuan DM&R Department-a thawktute, State Disaster Response Force, District Disaster Management Authority leh chhanchhuah hna thawka che chhuak thin khawtlang leh NGO hrang hrangte chu khawtlang thlamuantu, zo nun ze mawi tlawmngaihna leh huaisenna pho lang thintute an nih thu sawiin, ram leh hnam tana hna ropui tak thawktute an nih thu a sawi a. Khuarel chhiatna thleng avanga hmun hrang hranga chhanchhuah hna thawktute thawmthat lehzualna tur hmanraw chi hrang hrang sem theih a ruahmanna siam a ni chu lawmawm a tih thu a sawi.

DM&R Minister chuan, chhanchhuah leh chhawmdawl hna thawk tur hian hmanraw tha a pawimawh rualin thawktuten rilru leh taksa hrisel an neih tel a pawimawh thu a sawi a. Hmanrua kan neih ang angte chu uluk taka enkawl a tul bakah a hun takah a nihna tur ang taka hman tangkai a nih theih nan a hmangtu turte pawhin hmanrua chi hrang hrangte chu kan hriatchian a, a nihna tur taka kan hman thiam a pawimawh thu a sawi bawk a ni.

Prof. Lalnilawma chuan khualrel chhiatna thleng a awm rualin mihring fimkhur tawk loh avanga chhiatna thleng thei a awm thu a sawi a. In sak kawngahte, tui chhe paihna siam kawngahte, leivung leh bawlhhlawh kan paih dan ahte, khawtlang kan him zawk nan DM&R-in thuchhuah a siam thinte ngaih pawimawh a, zawm hram hram a tul thu a sawi a. Vawiina hmanraw semte chu hman loh theih chu duhthusam a nih rualin hman a tul hun a lo thlen palh hlauh pawh a tangkai taka hman a nih theih nan a dawngtute chu duhsakna a hlan a ni. 

DM&R Secretary Pi K.Lalrinzuali chuan khuarel chiatna thlen chang a chhanchhuah hna thawhna kawngah Sawrkar Department hrang hrang leh khawtlang leh tlawmngai pawl inkarah tanrualna leh thawhhona tha tak a awm thin chu lawmawm a tih thu a sawi a. State Disaster Management Authority thurel hlawhtling taka bawhzuina avanga chhanchhuah hna thawktute thawmthat lehzualna tur hmanrua chi hrang hrang sem a ni ta chu lawmawm a tih thu a sawi bawk a ni.

Pu K.Lalbiakfela, Deputy Director chuan vawiina sem chhuah ‘Search & Rescue Equipments’ chungchangah report a pe a. ‘Leimin laka inven dan’ tih thupui hmanga video tawi insiamsakna result puan niin lawmman sem nghal a ni bawk. 

‘Search & Rescue Equipments’-te hi Mizoram chhunga District Disaster Management Authority/Deputy Commissioner’s Office hrang hrang te, MAP leh IR Battalion hrang hrang a State Disaster Response Force te, Village Disaster Management Committee te leh NGO hrang hrang, YMA, MTP te hnen ah sem chhuah a ni. 

Khuarel chhiatna chi hrang hrang a lo thlen thulha hman tangkai tur hmanrua chi 24 leh ralkhel dar Siren lian 12 leh Siren te 87 sem chhuah niin, heng hmanrua sem chhuah te hi a bikin tuitla chhanchhuahna leh a zawnna kawng a hman tur te, khampang leh inchhawng sang atang a inchhanchhuahna tur hmanrua te an ni.

Heng bak ah hian Indian Red Cross Society, Mizoram State Branch ten Disaster Management and Rehabilitation Department hnen a Blanket 300 an hlan chu Champhai District a hman turin sem chhuah nghal a ni bawk. 

‘Leimin laka inven dan’ tih thupui hmang a Reels insiamsiakna lawmman pakhatna dawngtu chu Spf 150x, Tanhril niin, pahnihna dawngtu chu Hlimen Branch KTP an ni a, pathumna dawngtu hi Chamlianzuala, Mission veng a ni. Mi pariat hnen ah Consolation prize pek a ni bawk.