Vawiin khan State Disaster Response Force Training Centre, CTI Sesawngah a vawi 9-na atan NGOs Training on Basic Disaster Management hawnna hun hman a ni a, Disaster Management & Rehabilitation Department Minister Pu C.Ngunlianchunga chu Khuallian niin he hun hi a hmanpui.
DM&R Minister Pu C.Ngunlianchunga chuan Lawngtlai leh Siaha district atanga NGO te Basic Disaster Management inzirtirna hi a vawikhatna a ni a, khuarel chhiaprutna lo hmachhawnna kawngah heng district a mipuite kaihruaia zirtirtutur in ni dawn a ni, a ti a, he traininga in thil zirte chu mahni chhungkua leh thenawm khawvengah theuh atam thei ang ber hrilhhriat ve tum theuh ang u, a ti bawk. Khaw hrang hrang atanga Young Lai Association (YLA) leh Mara Thyutlia Py (MTP) member 60 lai an rawn kal thei chu lawmawm a tih thu a sawi a, mawhphurhna sang tak an kovah a awm dawn avangin training chhung chuan tumruhna leh tihtakzetna nena zir turin leh chhawrtlaka rawn zir chhuak ngei turin a chah bawk.
Training on Basic Disaster Management hawnna hun hi Pu H.Dolianbuaia, Joint Director, DM&R in kaihruaiin trainee te chu nungchang mawi leh hunbi vawng tlat turin a chah a, thiamna tak haichhuak tur chuan kan thil hriatchianloh te chu huai taka trainer te zawt zel turin a chah bawk. Pu H.Lalduata, Assistant Director DM&R hnen atangin Training kalpui dantur tlangpui ngaihthlak a ni a, Pu Keshor TM, Course In-Charge, NDRF in thusawina hun hmangin Pu C.Lalruaia, Joint Director (Ops) DM&R in lawmthu sawina hun a hmang bawk.
NGOs Training on Basic Disaster Management for YLA leh MTP hi a batch 9 na an ni a, Lawngtlai district atangin YLA member 33 leh Siaha district atangin MTP member 27 an tel a, an zingah hian hmeichhia 4 an tel a ni. Training hi thla khat chhung awh tura ruahman a ni a, Module 4 a then niin 1st module ah Medical First Responder training, 2nd module ah Collapse structure search and rescue, 3rd module ah Equiptment handling, maintenance & Rope rescue leh 4th module ah Flood Rescue and Chemical, Biological, Radiological and Nuclear Emergency a ni ang.
