Vawiin khan DC Conference Hall Mamit-ah  Tripura Reang (Bru) Relief Camp 6-a Mamit District chhunga rawn let tur,  chhungkaw 4199 te, hruaikir  hnathawh dan tur ngaituahin Pi Lalbiaksangi, Jt.Secretary, Home Department hoin an thukhawm a ni.

Ministry of Home Affairs thu anga, Mizoram Sawrkar, Tripura Sawrkar leh Mizoram Bru Displaced Peoples Forum ten inremna an siam angin August ni 14, 2018 atanga September ni 16, 2018 chhungin Tripura Relief Camp 6 atanga Mamit District chhunga rawn let tur Reang Bru   chhungkaw 4199 te laklet hna thawh tura ruahmanna siam a ni a.  Heng hruaikir te hi  Mamit District chhunga Constituency pathuma khaw 48 ah te dah tum an ni. 

Vawiin meeting hian laklet hna thawhna tur atana inbuatsaihna hrang hrang, venhimna, Hriselna leh tul dang hrang hrangte sawiho a ni a, venhimna lam pawh tha taka kalpui a nih theihnan  SP, Mamit leh Commandant 4th IR te chu ruahmanna lo siam tura tih an ni. Facilitation Centre hi Kanhmun ah siam tum a ni a, heng bakah hian Zamuang, Mamit leh Kawrtethawvengah te  Staging area  siam a ni ang. Staging area a an awm chhung hian   ei leh in, tui in tur, inthiarna leh Medical facilities te pek an ni ang.

Tripura Transit Camp paruka Reang ( Bru) hruaikir te tan hian Central Sawrkar chuan an in tunnun na tur, in leh lo dinna tur leh kum 2 chhung Free Ration a pe dawn a ni. Mizorama an rawn let huna an chenna tur khua theuh V/C te leh anmahni buaipui tura ruat Administrative Officer (AO) te ruahmanna in, In hmun pek tawh an ni a, An letna khua theuhah hian khawtlang hruaitute nen inbe rawnin an chen lailawkna tur  Temporary Shelter sak sak an ni bawk ang.

Reang(Bru) ,Mizorama rawn lette hi Mamit District chhung khaw 48 ah te dah tura ruahman a ni a, 1- Hachhek Constituency huam chhung-ah hian chhungkaw 2358 dah tura ruahman niin, 2- Dampa Constituency huam chhungah hian chhungkaw 432 dah tum a ni a.  3- Mamit Constituency huam chhungah hian chhungkaw 1409 dah tura ruahman a ni bawk. 

Pi Lalbiaksangi, Joint Secretary, Home chuan Mizoram mi leh sa, Tripura Transit camp paruka  Reang(Bru) laklet hna,  hlawhtling tak leh boruak muanawm tak hnuaia kalpui a nih theihnan Tlawmngai pawl hrang hrang te thawhpuiah a sawm bawk a ni.

Meeting hi Pu Bhupesh Chaudhary District Bawrhsap chuan kaihruaiin, Pu Jacob Lalawmpuia, Addl DC, Nodal Officer  chuan Reang(Bru) laklet hna thawhna tura ruahmanna siamte sawizauna a lem nena entirin a nei a, Meetingah hian Mamit District Level Core Committee on Reang(Bru) Repatriation members te leh sawmbikte an tel a ni.