Vawiin khan Finance Minister Pu Lalsawta leh Health Minister Pu Lal Thanzara ten New Economic Development Policy (NEDP) sum hmanga lei medical khawl sawmthum chuang Aizawl Civil Hospital-ah an hawng.
Biomedical equipments hrang hrang hawnna programme-a khuallian Pu Lalsawta chuan NEDP hi hmasawnna huapzo ruahmanna - comprehensive growth strategy a ni a, sector thlur bik nei lovin mipui mamawhna kawng hrang hrangah hman a ni, a ti. Civil Hospital tana khawl tha leh manto tak tak NEDP sum hmanga leite chu mipui rawngbawlna atana hman tur a ni a. Hmasawnna hna tul hrang hrang thawh mek zel a nih lai hian health sector chu mipui mamawhna a nasat avangin sawrkarin a ngai pawimawh leh zual a, theih tawp chhuahin a tihchangtlun hna hi sawrkarin a thawk zel dawn a ni, Finance Minister Pu Lalsawta a ti.
Health Minister Pu Lal Thanzara chuan doctor-te thiamna in tlin mahse khawl tha a awm loh avangin phai damdawi in lianah damlo tam tak refer an ngai thin a. NEDP sum hmanga lei khawl thar tha leh tun lai ber ber, Civil Hospital-a dah a ni hi mipui leh sawrkar tan malsawmna nasa tak a ni, a ti.
Heng khawl thar leh hmanraw thar hawn tak te hi Anaesthesia work station pahnih; mechanical ventilator pathum; 500KVA diesel generator pahnih, hemodialysis pali, RO Plant - Metcom System pahnih, Oxygen Cylinder Type A,B,C leh Flow Meter; Oxygen Generating Plant; orthopaedic operation table with fracture table, drill machine, spinal surgery set, anthroscopy instrument; colposcope machine & accessories; hydraulic operation table (maquet); ultrasound machine; OT Table USI-203E (C Arm compatible); paediatric ventilator; C.PAP Machine; Endoscopy Machine (Olympus Optera); autorepractometer (NIDEK); YAG Laser (ZEISS); B-Scan (Biomedics); Vitrectomy Constellation (Alcon); Biochemistry Analyser Erba Chem 7; Mini Vides Immunochemistry Analyser (Biomerleux); Automated Blood Cell Counter Swelab; Laparoscopic Set HD; ESWL Machine (Dornier HM); PCNL Set (Wolf); Automatic Tissue Processor & Microtome machine; 3KVA Stabilizer te an ni.
Civil Hospital in a la neih ngai loh Paediatric Ventilator thar neih tak hi nausen thawk harsa, piangsual leh thla kimlo avanga thawk harsa te, nausen zai ngai te, thawkna pe tu khawl tha leh changkang tak a ni a. Khawl thar neih a nih hnuah naupang sawm chuangin an hmang hman der tawh a ni. Nausen thawk harsa tanpuitu khawl pawimawh chi dang C.PAP Machine pawh lei thar a ni bawk a. Heng khawl pahnih lei tharte avang hian naupang thihna IMR a tlakhniam phah ngei beisei a ni.
Eye OPD tan YAG Laser - zunthlumin mit a tihchhiat tur venna khawl bakah mitna zawnchhuahna atana tangkai B-Scan - mit utlrasound khawl thar lei niin heng hmanrua hi Aizawl Civil hospital-in a neih vawikhatna a ni a. Colposcope machine neih thar hi enlenna tha bik nena thuam niin chhul hmawr (cervix) cancer hmuchhuah nan a tangkai hle a, a tir te a hmuhchhuahna hmanraw tha ber ti zinga mi a ni. Flexible Bronchoscope hi kum 5 chuang zet hospital in a kawl tawhloh hnuin chuap leh thli dawt te endikna tur hmanrua lei thar a nih tak avangin heng natna veitu damlo te phaia refer a ti tawp ta bawk. Zun kawnga lungte awm chhut kehna tur khawl leh kal a lung te awm zai hawng lova verhna khawl ESWL Machine leh PCNL Set te pawh a hma thei ang bera bun tum a ni a. Heng khawl thar changkang leh tunlai tak tak lei thar te hmanga Aizawl Civil Hospital thuam chak a nih tak avang hian damlo tam takin phai pan kher ngai lovin Aizawlah ngei enkawlna tha tak an dawn theih phah dawn a ni.
Biomedical equipments hawnna puala inkhawm tawi Doctors Seminar Room-a buatsaih hi Aizawl Civil Hospital Medical Superintendent Dr. K.L.Remsanga’n a kaihruai a. Deputy Medical Superintendent Dr. John Zohmingthanga’n report a pek bakah Mizoram Journalist Association President Pu Zonunsanga Khiangte leh Health Department hotu ten thu an sawi bawk a ni.
