1780/2024-2025

Aizawl dated 28th August 2024: Vaivakawn - Zohnuai kawng a lei tla hniam leh a bul hnai a in chim mai thei dinhmun a awm te en fiahin tukin khan Pu K.Sapdanga, Minister, Disaster Management & Rehabilitation Department, Pu Vanlalhlana, Minister, Public Works Engineering Department, Pu Lalnilawma, Minister, Public Health Engineering Department leh Pu W.Chhuanawma, Deputy Govt. Chief Whip-te chu a hmun ah an kal a. Director, DM&R, Deputy Commissioner, Aizawl aiawh, PHE, PWD, AMC, SIPMUI leh khawtlang hruaitute he hun ah hian an tel a ni.

DM&R Minister Pu K.Sapdanga chuan fur ruah tui tam avanga Vaivakawn - Zohnuai kawng a lei tla hniam leh leimin avanga harsatna hrang hrang thleng chu pawi a tih thu sawiin Sawrkar department hnuai a mithiamte enpuina hnuai ah ruahmanna siam thuai a tul thu a sawi a. Hemi kawng a hma la tur leh ruahmanna bawhzui tur hian Deputy Commissioner Office, Aizawl ruat ni se tih a ni.

PWD Minister Pu Vanlalhlana chuan khawtlang ah harsatna lian zawk a thlen loh nan in chim mai thei dinhmun a dingte chu a rang lamin a thiah hna kalpui a tul thu a sawi a. PHE Minister Pu Lalnilawma chuan khawtlang a harsatna thlengte ngaihven leh chhawmdawl tur a Sawrkar leh khawtlang hruaitute inpek thinna chu thlamuan thlak a tih thu a sawi bawk a ni.
Minister-te, Department hrang hrang a thawktute leh khawtlang hruaitute hian inkawm hona hun neiin Vaivakawn - Zohnuai kawng lei tla hniam zel tur ven nan tui kawng siam that a tul thu te, lei tla hniam zawn chho a in chim thei awm te thiah a tul thu te, motor lian leh load phur lirthei tlan khap rih a tul thu te sawi a ni a. Lei tla hniam avang a tui connection khaihlak te tan 'Temporary connection point' siam tur a hmalak a nih thu tarlan a ni.