404/2026-2027

Dated Aizawl, the 6^th May, 2026: Vawiin khan Disaster Management and Rehabilitation Minister Prof. Lalnilawma leh Sports, LESDE, etc.  Minister  leh  Aizawl West II bialtu ni bawk Pu Lalnghinglova Hmar ten Dinthar veng leh Tuikual South- a lei minna hmun an enfiah a,  Disaster Management  leh Geology and Mining lama mithiamte nen hmalak zel dan tur an sawiho.

Dinthar vengah hian  Pu Hmingthana in sak lai chu a hmunah an enfiah a, Local Council hruaitu ten lei chet tan dan te lo hrilhhriain;   Zonal Officer in hma an lo lak tan tawh dan hrang hrangte a sawifiah a, Inspection Team te nena an zirchianna atang chuan a rang thei ang bera thiah a tulthu  sawiin,  Z O chuan lirthei veivak pawh a chhehvelah tihtlem a tulthu a sawi bawk . Geology  & Mining lama mithiamte pawhin lei chet tan dan chinchang chu Minister te hi lo hrilhin,  uluk taka hmalak a nih chuan a chhehvelte tan harsatna liantham thlen lo a Pu Hmingthana in sak lai hi  thiah theih a nih ngei an beisei thu an tarlang bawk.

Minister Prof. Lalnilawma  chuan Geologist te  leh  Disaster lama official te kaihhruaina hnuaiah  tih tur tul chu tih vat  a ngaih thu In neitu leh  concern official  te a hrilh bawk. Minister chuan Pu Hmingthana in sak lai bakah a chhehvel a in ding lai te pawh an  enfiah  bawk.

Dinthar veng an enzawh hnu hian Minister te hian Tuikual South lama leiminna  hmun an enfiah leh a, Local Council hruaitu te leh DM& R official ten chhiatna lian zawk a thlen lohna tura an hmalak dan leh an hmachhawp te Minister hi an lo hrilh a. Minister te chuan  District Disaster Management Authority (DDMA) te, QRT te, Local Council  te, DM&R official te, Geology & Mining  Department official te leh khawtlang hruaitu te hnenah  lawmthu sawiin,Khuarel chhiatna a lo thlen chang a, rang taka an che chhuak thin leh chhiatna lian zawk a thlen loh nana thei tawp chhuaha hma an la vat thin chu ropui an tih thu sawiin, lawmthu an sawi bawk. Minister te hian Furpui kan hma chhawn turah Khuarel chhiatna thleng thei lakah mipui mimir pawh  kan fimkhura kan  inralrin reng a pawimawh thu an sawi bawk.