No.1201/2021-2022

Aizawl the 1st July, 2021 : Vawiin khan Disaster Management and Rehabilitation (DM&R) Minister Pu Lalchamliana, Home Department changtu ni bawk chuan kangthelh motor tha chi High Pressure Pump Fire Tender pathum chu a tul hun apianga hman theih turin Fire & Emergency Services Department hnenah a hlan. Hlanna inkhawm tawi hi MINECO Zero Point tualzawlah neih a ni a. Fire Tender pathumte hi State Disaster Management Authority (SDMA) phalnain Rs.1,39,50,000 (vaibelchhe khat nuai sawmthumpakua leh singnga) senga lei a ni.

DM&R Minister Pu Lalchamliana chuan Kangthelh Motor tha chi High Pressure Pump Fire Tender pathum zet lei a ni ta chu lawmawm a tih thu a sawi rualin kangthelh tur awm lo se tih chu a mimal duhthusam a ni, tih a sawi a. Kumin April ni 14 atanga chawlhkar khat chhung Fire Safety Week hman a nih hnuah ringawt pawh Mizoram chhung hmun 49 vel zetah ram kan avangin harsatna kan tawk hman a ni, a ti a. Kangmei chhuak avanga chhiatna thleng tam zawk hi mihringten kan thlen chawp a nih thin avangin mitin te kan fimkhur a tul hle a ni, a ti. Pu Lalchamliana chuan Lungleia kangmei rapthlak tak, Indian Airforce pun ngai hial khawpa nasa chungchang sawi langin khami tuma ram kang thelhnaa thawkchhuak zawng zawng chungah lawmthu a sawi a. Mizoram Sawrkar chuan ram kan chhan chhui chiangtu tur team a din thu leh report dawn thuai beisei a nih thu a sawi lang bawk.

High Pressure Pump Fire Tender pathumte hi restricted tender kaltlangin Sova-High Tech Industries, Guwahati atanga lei a ni a. TATA 712 LPT Chassis niin tui litre 3500 a phur thei a. A phuh nat zawng hi 1cm biala kg 7 a rita den ang a ni a, minute 1-ah litre 2000 a phuh thei a ni. SDMA in a rel angin Mizoram luhka - Vairengte, Bairabi leh Kanhmun atanga chakkhai phur motor lian rawn lutte disinfectant hmanga phuhna atan leh tul danga hman theih tura ruahman a ni.

Programme hi Pi Lalbiaksangi, Secretary, DM&R Department chuan a kaihruai a. Pu John LT Sanga, Director, DM&R Department chuan report tawi a pe a. Pu Francis Lalthantluanga Ralte, SP, Fire & Emergency Services Department chuan technical report pein Pu Vanlalmawia, Addl.Secretary, DM&R Department chuan lawmthu sawiin hun hnung a khar a ni.