Nimin (28.8.2015) khan Disaster Management & Rehabilitation Special Secretary Dr. Lalrozama chuan Champhai Kanan Veng leitawlh thinna hmun chu tlawhin, kumin fur atana DM&R tanpuina hmuh atanga hmalakna te chu a enfiah a. DM&R Special Secretary hi Champhai DC Pu H. Lalengmawia leh official dang ten an tawiawm a ni.
Champhai District Administration hmalaknain kumin fur chhunga chhiatna nasa zawk pumpelh nan DM&R atanga an sum hmuh atangin Kanan leitawlhna hmun hi rangva leh silpauline hmanga khuh hul hna thawh a ni a. Champhai DC chuan tunkar ruahsur nasat avanga Mizoram hmun hrang hranga leimin leh chhiatna dang a thlen laiin helai hmun hi leitawlh a nasa vak lo ni a hriat a nih thu a sawi a. Amaherawhchu tuna hmalakna hi fur khat atan chauh a nih avangin daihrei tura hmalakna puitling tak neih a pawimawh thu a sawi a ni.
Tunkar ni 27.08.2015 khan Champhai DC ho hian Champhai Addl. SP, CMO leh PHED SE-te chuan ruah sur nasa vanga Khawzawl Vengthar huamchhunga lei chet belh chu an enfiah bawk a. He lai hmun hi tunkar chhung khan feet 1 leh a chanve in a tlakhniam belh a. DC Pu H. Lalengmawia chuan Joint Village Council President hovin Khawzawl huamchhunga lei chet leh chhiatna dang thleng chungchangah inkawmin, hmalak dan tur a sawipui bawk.
