Nimin ni 3 May, 2012 khan Chief Minister Pu Lal Thanhawla chuan ‘Doctor-te hna hi hna ropui leh zahawm a ni a, mite pawhin an chung en avangin mipuite entawntlaka an awm a tul a ni’, a ti. He thu hi nimin a Falkawna Mizoram Government Doctors’ Association (MGDA) Conference vawi 29-na a hmanpuina a a sawi a ni.

Chief Minister chuan mipui ten mahni hriselna theuh kan ngaihpawimawh theih nan Doctor te chu hemi lama hmahruaitu tur an ni a ti a. Damlo mirethei zawk te ban phaka awm tura chahin, tha zawk leh chak zawka ram leh hnam rawng an bawl theih nan, neitu rilru puchunga theihtawp chhuah chhunzawm zel turin Doctorte chu a chah a. Mihringte hi kan dam chhunga zir reng tur kan nih angin, doctor tan phei chuan zir tur atam bik a, chuvangin englai pawha tan an lak reng angai a ni a ti.

Hriselna lamah kawng hrang hranga lawmman kan dawnna ah, Chief Minister chuan lawmman dawnah duh tawk mai lova, kan chak lohna te siam tha chunga tan la thar zelin, thawhchhuah tha tak (delivery system) kan neihna turin theihtawp i chhuah zel ang u a ti a. Kan mawhphurhna theuh hi kan zavai atan kan hlenchhuah hi a pawimawh a, kan ngaihthuah hmasak tur chu kan ram leh hnamte anni a ti. Doctor pension ta te chungchang a sawiah, Chief Minister chuan Doctor te leh Pastor te hi an hna atangin pension mahse, a hnathawhah an pension san tak tak theilo a ni a ti.

Chief Minister hian MGDA Annual Magazine leh Directory a tlangzarh nghal bawk a ni.

Khualzahawm Health Minister Pu Lalrinliana Sailo chuan kawng hrang hranga Mizoram in hriselna lama lawmman a dawnte chu Health Department-a thawktute thawh hona that vang leh thawhrimna vang a ni tiin, tun aia hmasawn leh zual turin ngaihtuahna thar i hmang zel ang u a ti a. Aizawl Civil Hospital chu sorkar hospital zingah cornea transplant (mit naute zai) ti hmasa ber leh RSBY a ti tha ber state anih thu a sawi bawk a ni.

Kum 2011 -2012 chhunga Doctor pension ta te thlahna, Citation leh pawisa fai Doctor 4 te hnenah conference ah hian hlan an ni bawk a, hemi chhung veka doctor pahnih boralte sunna hun hman a ni bawk a ni.

MGDA Conference ah hian thurel an pawmte zingah, Hmun kilkhawr zawka mite harsatna phuhru turin PHC tinah regular Medical Doctor post pahnih zel sawrkarin dah rawh se tih te, Mizorama IMR leh Health Indicators dangte a lo that zawk theih nan sorkarin chak zawkin hma la rawh se tih te, Health Department-in award hrang hrang a dawnte lawm ni se, hemi denchhen hian MGDA in charity pek ni rawh se tih leh Sorkarin kum tin regular Doctor la se la, post thar siam belh zel ni rawh se tih te a tel a, heng bakah hian Private Agenda thenkhat an pawmpui bawk a ni.

Conference hi MGDA Vice President Dr.Gordon Zohmingthanga’n a kaihruai a ni.