Mizoram Government Doctors Association ( M.G.D.A) te chuan vawiin khan 32nd Annual General Conference Aijal Club ah an hmang a. Health Minister Pu Lal Thanzara chuan he hun hi hmanpui in MGDA te 16th Annual Magazine 2015 a tlangzarh nghal a ni.
Doctor te hna hi hna zahawm tak anih avang in tih hminghliau palh theih na lakah fimkhur a ngaih thu khuallian chuan sawiin Sorkar chuan ram mipuite hriselna tur in nasa tak in tan a lak laiin kawng hrang hrang atangin harsatna te a awm lo thei lo,chutih lain hmasawna rah hmuh tur a awm reng chu lawmawm a tih thu a sawi.
Mi lian leh mi te, mi ze hrang hrang in an bawr reng thin avangin Doctor te chu tawngkam chetzia leh nun uluk a ngai em em a,damlo leh damlo chhungte bulah tawngkam fimkhur a ngaiin tawngkam mawilo leh dengkhawngte avangin department in harsatna leh mualphona a tawk thei a, chumi pumpelh tur chuan MGDA member te chu chetzia ah leh tawngkam ah te fimkhur angai a, damlo ten an mamawh bak damdawi Doctor tha chuan an chawh tur a ni lo tiin mamawhtu te tana thlamuanpui tlak ni turin Health Minister chuan a chah a. Damlo enkawl kawngah dawhthei taka an dinhmun diktak an chhungte hnenah hrilhfiah thin turin chah bawk. Damlo dawnsawn dan ah enkawlna (treatment) ah pawh fimkhur angai a ni tiin Doctor chu sum tam tak aia hmingthat thlanga, hmun thenkhata damdawi zuar Company te nena inthuruala therhlo engemaw dawn duh vanga damlo mamawh loh Test chi hrang hrang test tir leh an mamawh loh damdawi damlo te chawh ching thin te anga ti ve lo turin a ngen a ni.
Health Minister chuan khawvel finna chak taka thangchho rengah in ‘Up-Date’ reng a tul thu leh Social Media chak tak a awm tawh avangin taima tak leh fimkhur taka thawh a tul bakah an hna chu hna hahthlak tak , hunbi mumal lo lutuk karah thawk thin an nih avangin an rilru leh taksa hriselna pawh enkawl uluk turin a chah bawk a ni.
Pu Lal Thanzara chuan Health and Family Welfare Department hmasawnna leh hmalakna chi hrang hrang tarlangin, Falkawn-a Medical College & Mizoram Institute of Medical Research a zirlai 50 atana ruahman chu kumin ngeia tan hman tum anih lai in, zirlai 100 lut theihna tura tih danglam tum anih thu leh hemi ti tur hian damlo khum 172 awm mek chu khum 300 a tihpun a tula, hemi ti tur hian Rs. vaibelchhe 280 senna tur DPR chu nimin khan thehluh a ni a. Hetiang dinhmuna a awm leh tak avang hian kumina tan hman tura ruahman chu Medical Council of India in phalna a pek turin an kutah a awm leh mek tih a sawi a. Health Minister chuan NHM hnuaia Doctor te hlawh tihpun anih thu te, Kulikawna Mental Hospital leh Lawngtlai District Hospital sak tan thuai beisei anih thu bakah Zemabawka Tertiary Cancer Care Centre (TCCC) ah state danga cancer te zai theihna ang chi awm theihna tur building cheng vaibelchhe 45 hmanga sak anih tur thu a sawi bawk a ni.
MGDA Annual General Conference hi an pawl Vice President Dr. Rohmingthanga Ralte in a kaihruai a, Dr. K. Lalbiakzuala President in thuchah sawiin, General Secretary Dr. C Lalhrekima’n an an kum hmanral tak report kimchang a pe bawk a. MGDA Conference ah hian an member thi Dr. John M Ralte leh Dr H.B James ralna hun hman anih bakah pension thar Dr. James Thanzama, Dr R L Dangvela leh Dr. B Lalramzauva te thlahna hun hman a ni bawk a ni.
MGDA hian chawhnu lamah an pawl inthlanna an neih bakah Business Session neiin an pawl thil pawimawh chi hrang hrang an rel a ni.
