Chief Minister Pu Lal Thanhawla chuan National Bank for Agriculture and Rural Development (NABARD) office biulding sakna tur, New Secretariat Complex, Khatla a ACB building bulah vawiin khan lungphum a phum.

Chief Minister chuan NABARD hi Mizoram kuthnathawktu ten an tangkaipui hle thu sawiin, thingtlang khua hmasawnna kawngah pawh NABARD hian a thawh hlawk hle a ni a ti a. Khaw hrang hranga self help group te pawhin an chhawr tangkaipui thu a sawi a. Mizoramah an mahni puala office an nei thei tur chu a lawmpui hle a ni a ti a, Mizoram tan ni chhinchhiah tlak a ni a ti. Chief Minister chuan Mizoram mipui, abikin thingtlang lama loneimi ten nasa zawka bank te an tangkaipui theihna turin an credit deposit ratio ti tam tura commercial bank te a ngen thin thu a sawi a, hetah hian NABARD hian pawimawhna lian tak a nei thei a ni a ti. Mizoram sorkar nen pawh an thawh dunna a that thu sawiin, sorkar flagship programme NLUP phei chuan a tangkaipui hle a ni a ti a. Mizoram tana an hnathawhah lawmthu a sawi bawk a ni.

Lungphum phumna inkhawm hi ACB Building hnuaia buatsaih a ni a. NABARD Chairman Dr.Harsh Kumar Bhanwala leh Dy Managing Director H.R.Dave ten an rawn hmanpui bawk a ni.

NABARD office building hi hmarchhak state a pathumna a ni a, a dang pahnih te chu Assam ah leh Arunachal ah te an awm a ni.

NABARD office hmun hi Mizoram sorkarin kum 25 chhung atana a hman hawh (lease) tir a ni a, kumtin hawh man (lease premium ) an chawi ve dawn a ni. Office building sak tur hi Rs. 12 crore vel senga sak tur a ni a, chhawng 7 tura ruahman niin, 2600 sqm a zau a thut dawn a ni. A sak hna hi Mizoram PWD enkawl tur a ni.