Vawiin chawhnu dar 1:00 khan Social Welfare Minister Pu P.C.Lalthanliana hovin ama office chamber ah State Level Committee for Older Persons (SLCOP) an thukhawm a, ni 11.9.2014-a Mizoram State Council for Older Persons (MSCOP) meeting thurel te thlir hovin Mizoram Maintenance & Welfare of Parents & Senior Citizens Rules 2013 bawhzui dan turte an rel ho a ni. Meeting ah hian MUP atanga rawtna hrang hrang thehluh te an sawiho bawk. Tar Pension hi kum 2013-2014 chhung khan mi 25,251 hnenah pek a ni a, kum 2014-2015 chhung khan mi 218 tih belh niin tunah hian mi 25,469 hnenah pek mek an ni. Hemi zingah hian kum 80 chin chunglam tan mi pakhat hnenah thlatin Rs 550 /- zel pek an ni a, kum 80 hnuailam tan Rs 250 /- zel pek an ni bawk. Tar Pension atana sum hi Sawrkar Laipuia Ministry of Rural Development atanga rawn pek a ni a, Mizoram Sawrkar-in mi pakhat tan Rs 50 /- zelin a lo khinglet ve a ni. Ministry of RD atang hian November 2014 thleng chauh sum hmuh a ni a, a bak sum dawn a la ni lo a ni.

Vawiin SLCOP meeting ah hian kum 65 chin tan City Bus chuan man tlawm zawka (50%) ruahmansak turin Aizawl City Bus Owners Association (ACBOA) sawipui ni se tiin an rel a, kum 65 chin tan Mizoram House leh government accommodation ah man tlawma thlentir turin Sawrkar ah thlen ni se an ti bawk. Vawiin SLCOP meeting ah hian Parliamentary Secretary Pu K.Lalrinthanga, Social Welfare Commissioner Pu Lalrinliana Fanai, MUP, MHIP, MSWB, Civil Pensioner Association leh department kaihhnawih aiawh te bakah prominent citizen te an kal a ni.