Baptist Higher Secondary School, Serkawn, Lunglei atanga kumin HSLC 2015 Examination-a Topper nih hauhtu Jennifer Vanrammawii bakah 3rd rank hauhtu C.Lalnunfeli leh zirlai hlawhtling zawng zawngte lawmpuina leh chawimawina hun chu vawiin khan Tucker Hall, BHSS-ah hman a ni a. He hunah hian Parliamentary Secretary, i/c Education Pu Joseph Lalhimpuia pawh Special Guest nihna changin a telpui a; amah tawiawmtu Aizawl atangin Addl. Secy Education Pu Lalzirmawia Chhangte, RMSA Dy. SPD Pu C.Chawngthantluanga, Dy. Director UD&PA Pu R.Lalzidinga te pawh he hunah hian an tel ve a ni.

Vawiina BHSS Felicitation Programme neihah Pu Joseph Lalhimpuia chuan HSLC Topper-te leh zirlai hlawhtling zawng zawngte Mizoram sorkar aiawhin lawmpuina chibai a buk a; Mizoram Education Minister Pu Rohluna bakah MBSE Chairman, School Education leh SCERT Director-te pawhin amah kaltlangin lawmpuina chibai leh duhsakna an rawn hlan a ni tih a sawi bawk. BHSS bultantute chu Pathian pasaltha Pu Buanga leh Pu Sap Upa te an nih avangin he sikul atanga chhuakte chhinchhiahna ‘trademark’ chu Pathian ringtu leh mi rinawm a nih thin hi a ni tiin a fak a. Mizoramah zirnain hma a sawn theih nana zirlaite fuih nan HSLC leh HSSLC Topper-te chu Incentive Cash Award Rs.50,000 + Citation pek rawt a nih angin kumin HSSLC Result a chhuah hnu hun remchang hmasa berah Aizawl-ah sorkar huaihawtin heng zirlai chhuanawmte chawimawina hun hman a ni ang a, Mizoram pumah Live Telecast tum a ni tih a puang. Mizoram sorkar chuan sum harsatna karah pawh zirna tihmasawn nan theihtawp a chhuah mek zel a, zirtirtu lak dan Rules siam thain tun atanga reiloteah MPSC kaltlangin Middle School tan a bik takin Science, Mathematics leh English Subjects zirtirtu 102 lak tum a nih thu leh chutiang bawkin High School atan pawh heng Subject 3 atan zirtirtu lakbelh thuai a nih tur thu a tarlang bawk. Mizoram Education Reforms Commission chuan School hrang hrang tihchangtlun nan Cheng vaibelchhe 14 NEC-ah a dil mek a, hemi atang hian Govt. Lunglei HSS-ah pawh Science Laboratory tha tak siam tum a nih thu leh Lunglei-ah ‘Education Complex’ leh ‘Education Guest House’ pawh siam turin chak takin hmalak mek a ni, a ti. Parliamentary Secretary Pu Joseph Lalhimpuia hian HSLC Topper leh zirlai hlawhtling (Distinction, 1st Divn, Letters hmu) te lawmman a hlan nghal bawk.

Vawiin BHSS zirlai tithate chawimawina inkhawmah hian BHSS Principal Pu C.Lalhmingmuana pawhin an sikul chanchin tlangpui a tarlang a, kum 25 chhung chu HSLC/HSSLC Top 10-a lang pha zirlai an nei tawh lo chu zirtirtu ten tanlak zual nan an hmang a, BCM hnuaia kohhran tinte hnenah Topper an neih theihna turin tawngtainaah dilsak turin lehkha an thawn thu a sawi a. Kohhrante tawngtaina rah avangin BHSS-in 2013 atangin Top 10-ah zirlai hlawhtling an nei chho leh tan a, kuminah chuan Mizoram puma 1-na an hauh thei chu Pathianin an tawngtaina a chhanna a ni, a ti.

BHSS Felicitation Programme-ah hian BCM President Rev.C.Ngurhnema bakah Rev. Lalbiaksanga Chinzah, AGS i/c Service; BCM Secretary Rev. H.Lianngaia; BCM President Elect Rev.Lalthangliana leh BHSS Vice-Principal Pu Lalrinmawia te pawhin lawmpuina thu an sawi a. Lunglei DEO & Staff bakah Govt. Lunglei HSS Principal, Faculty & Staff ten Topper-te hnenah lawmpuina thilpek an hlan bawk a ni.

Attachment

  • Loading attachment...