No.6922/2020-2021

Vawiin chawhnu khan I&PR Conference Hall, Kolasibah Covid-19 hrileng dona kawnga Kolasib district chhunga Sawrkar, Village Level Task Force leh NGO volunteer hrang hrangte hmalakna ziahna bu, Task Group on Documentation, Kolasib district buatsaih,’ Documentation on Covid-19, Kolasib District, Volume-1’ chu Dr.H.Lalthlangliana, Deputy Commissioner-in a tlangzarh.  

Dr.H.Lalthlangliana chuan Covid-19 hripui dona kawng hrang hrang chhinchhiah a, ziak a dahthat a ni chu lawmawm a tih thu sawiin nakin hun lo la awm zel tur a inzirna hmanraw tangkai tak a nih tur thu a sawi. Vaccine pe chhuak turin Sawrkar a inbuatsaih mek thu sawiin chutih rual chuan tumah inthlahdah lo turin a chah a,” Kumin Christmas leh kum thar lo thleng tur ahte hian theihtawp chhuahin Covid-19 hi la do tlang ila, mahni awm hmun theuh ah fimkhurna kalpui chhunzawm zel ang u,” a ti.

Dr.Hmingthanzuala, DIPRO chuan Task Group on Documentation, Kolasib district hmalakna leh ‘Documentation on Covid-19, Kolasib District, Volume-1’ chungchang sawi zauna hun neiin Volume-II pawh buatsaih mek a nih thu a sawi bawk a ni. Lehkhabu tlangzarhna hi Pu. Stephen Laltlansanga Auhmun, APO, DRDA in hun a kaihruai a, Task Group on Documentation member leh NGO hruaitute an tel a ni.

‘Documentation on Covid-19, Kolasib District, Volume-1’ ah hian phek 186 awmin then 15 a awm a, ni 12.02.2020 atanga ni 30.06.2020 chhung a Covid-19 dona kawng a hmalakna hrang hrang a chuang a ni. District Level Task Force, Village Level Task Force, Quarantine Facility Management Team, Border Safety Monitoring team, Essential Commodities Monitoring team leh Medical lam hmalakna pawimawh tak tak ziah lan a ni a. Bairabi rel chawlhhmuna Mizoram mi leh sa tangkhang hmuah dan chungchang pawh kimchang tak a tarlan a ni bawk.