Union Minister of State for Development of North Eastern Region (DoNER) Minister Dr.Jitendra Singh hovin vawiin chawhma khan New Secretariat Conference Hall-ah Water, Sanitation and Hygiene (WASH) Workshop neih a ni. 

DoNER Minister chuan sawrkar laipui hmalaknain ram pumah faina beihpui thlak mek a ni a, a hlawhtlinna tur chuan India rama mi chengten beihpui thlak hunchhung chauh ni lova, fai hi nunphung ve renga an neih a tul a ni, a ti. State dangte nena khaikhinin Mizoram chuan faina kawngah hma a sawn chak hle a, pawna inthiar awm tawhlohna Open Defecation Free State a puan theih turin chak takin hma a la mek tih hriain Dr.Jitendra Singh chuan hmun dangte tan pawha entawntlak khawpa State fai neih tum turin Mizoram mipuite a chah a. Faina leh thianghlimna hian mahni leh chenna hmun tihfai mai bakah rilru leh ngaihtuahna thianghlim thlengin a keng tel a ni, a ti. 

He huna khual zahawm Health Minister Pu Lal Thanzara chuan Mizoram chu fai leh thianghlimna kawngah nasa takin a thang a,  kum 2006 leh 2014 inkarah ringawt hriselna leh faina kawnga hmasawnna avangin Mizoramah naupang cher lutuk (underweight) za zelah panga in an tlahniam hman a, naupang thang theilo (stunting) rate pawh za zelah 92 zetin a tlahniam, a ti a. Fai leh thianghlimna kawnga Mizoramin chak zawka hma a sawn theih nan mitinte an pawimawh a, zirlai naupangte atangin zirtirtu, nu leh pa te, khawtlang hruaitute leh sawrkar thawhho leh tanrualna a pawimawh hle a ni, a ti bawk.  

Mizoram Chief Secretary Pu Lalmalsawma kaihhruai WASH Workshop-ah hian Department pali- Urban Development & Poverty Alleviation (UD&PA), Public Health Engineering (PHE), School Education leh Health Department aiawhten faina beihpui Swachh Bharat an kalpui dan leh an hmalakna tlangpui an tarlang a. Mizoram hian faina hapta hi kum 1977 atang khan a lo hmang tan tawh a, kumin hi a kum 40-na niin India rama state fai ber nih tumin tan a la mek a. Kum 2015-ah khan State khawpui fai thlanchhuah zingah pakuana niin 2017-18-ah khawpui 434 zingah 105-na a ni. Mizoram State-a khawpui 17-te ODF an ni tawh a, endikna hmachhawn tur khawpui panga an la awm.UD&PA Department chuan sanitation-a an thawh that avangin Skoch Award leh HUDCO Award pawh a lo dawng tawh nghe nghe. 

Ministry of Human Resource Development-in Swachh Vidayala Puraskar a kalpuiah kum 2016-17 chhung khan Mizoram atangin school 22-te chu school fai, five star nihna pek an ni a, Champhai District atangin school pakua zet he intihsiaknaa an tel theih avangin school tel thei tam ber dawttu an ni a, HRD Minister hnen atangin Award an dawng a ni. 

DoNER Minister hi DoNER Jt. Secretary Ravindra Chowdhary leh DoNER Director (i/c Mizoram) Ravindra Chowdhary ten an tawiawm a. Workshop-ah hian Mizoram sawrkar hotulute bakah Public Health Foundation of India (PHFI) atangin Senior Advisor, scientist, architect leh North East Region Head te an tel a ni.