Vawiin khan Higher & Technical Education Minister Pu R. Romawia chuan Lal  Thanhawla   Auditorium-ah ICFAI University Freshers’ Social a hmanpui. 

Khuallian Pu R. Romawia chuan ICFAI University  din tirh atanga kum 10 chhunga an hmasawnna te chu lawmawm a tih thu sawiin  campus changtlung tak leh course 17 lai zirlaite eizawnna lama pui theitu tur an nei chu  lawmawm a ti a. Minister chuan zirna leh subject/course te chu tunlai ram changkang zelin a mamawh nen inmilin duan a tul thu leh zirlaite tan pawh  mahni course tur thlan thiam a pawimawh thu a sawi a . Thalaiten MBA, BBA leh hospitality lam subject lak an uar chho chu lawmawm a tih thu sawiin sawrkar hna ringawt nilo eizawnna ngelnghet sumdawnna lamah emaw a dangah pawh nei thei tura an zirna leh thiamna te hmang tangkai turin a fuih a. Freshers te chu  tunlai technology thar te bawih a awm lovin mahni hmasawnna  leh hlawkna tura hmang zawk turin a chah a. Zirlaite hnenah chuan degree neih ringawt tum lova an thiamna leh finna te chhungkua, thenawm khawveng, ram leh hnam tana chhawr theih tura in zirchhuak turin Higher & Technical Education Minister chuan a fuih bawk a ni. 

He hunah hian ICFAI University Vice- Chancellor Lt.Gen. Dr. A.K Misra AVSM(rtd) pawhin thusawiin ICFAI University hnuaiah law college leh department thar te la hawn belh zel an beisei thu leh an hmachhawp hrang hrangte  a tarlang a. Pu Joseph Lalremsanga Registrar ICFAI University hnen atangin thusawi ngaihthlak bawk a ni. 

Institute of Chartered Financial Analysts of India (ICFAI) University hi  Mizoramah kum 2006-ah din a ni a. Freshers social-ah hian zirlai thar 372  lawm lutin tun dinhmunah zirlai 752 an awm a . Undergraduate ah course 9 leh Post-graduate ah course 8 an nei mek a ni.