Vawiin chawhnu dar 2:00 khan DoNER changtu Union Minister of State Pu Paban Singh Ghatowar chuan Lunglei tlawhin Saikuti Hall ah 110 km. a thui 132KV Sub Station Aizawl (Melriat Sub Station) - Lunglei Line thar, Electric hruipui thlun zawm hna tawh tan nan lungphum a phum a. DoNER Minister hi Chief Minister Pu Lal Thanhawla te nupa bakah Home Minister Pu R. Lalzirliana, PHE Minister Pu S. Hiato, UD&PA Minister Pu Zodintluanga te leh Pu Vijay Bhusan Pathak, Joint Secretary, DoNER, Pu K. Guite, Director, DoNER leh Pu Niraj Verma, PS to Union Minister ten an tawiawm a ni.

DoNER Minister chuan Mizoram chu hun reilote chhunga state thang chak ber zing ami leh state ralmuang ber a nih thu a sawi a. A awmna hmun hian remchanna leh India ram tana a pawimawhna thui tak nei a ni tih hi sawrkar laipui in a hrechiang a, a chhan chu Myanmar leh Bangladesh te nen ramri thui tak intawmni vang a ni, a ti. Mizoram hi Nature Paradise an lo ti hi a awm a. A chhunga Mizo mipui te hnamzia leh chi lam hrang hrang te, a ram hmul mawi tak leh ramsa chengte hi khualzin mite tan a mitla tur leh tlawh chhan tha tak tur a ni a ti a. Mizoram in hma a sawnna ti chiangtu chu a Gross State Domestic Product (GSDP) kum 2010-2011 a 9.57% lai ni thei hi a ni a. Ram pumpui GSDP chawhrual 8.6% aiin a sang zawk daih a ni a ti. Chief Minister leh a kaihhruai Mizoram sawrkar hian state per capita income kum 2007-2008 a Rs. 32,488/- ni thin kha kum 2010-2011 ah Rs. 50,021/- ah a hlangkai dawrh thei a, a fakawm hle a ni a ti a. “Human Developement Index of North Eastern States” ah Mizoram chu state tamtak aiin a HDI Score pawh a tha zawk a, hmasawnna tehfung dang ziak leh chhiar thiam tam zawng ah te, Naupiang damkhaw chhuah tam lam ah te leh mitin thlengphak hriselna kalpui dan ah te Mizoram hian hma a sawnzel a ni tih a ti lang a ti a. Mizoram in DoNER hnuaia NLCPR Scheme kaltlanga hma a lakna te a sawi lang leh a, tun dinhmun ah Rs.1,039.67 crore lai Project 125 tan Mizoram hnenah pek a ni tawh a. Mizoram hian Rs. 393.40 crore hmangin Project 65 lai a zawhfel vek tawhna Certificate a thehlut tawh a. Rs. 646.27 crore seng turin project lian 60 zet a kalpui mek a ni a ti. NEC (North Eastern Council) hnuaiah Dist. 8 huam chhunga Pa ( Mushroom) khawi leh enkawl nana hman tur Rs. 66.128 lakhs. ah NEC in `Rs.59.515 lakhs. a tum a. District 5 a Hospital ah Central Sterile leh Supply Department tih hmasawn nan hma a la mek a. Tlabung - Kawrpuichhuah kawng laih nan Rs. 14.16 crore a ruahman bawk a ni ati.

Chief Minister Pu Lal Thanhawla pawhin Mizoram tan Central Sawrkar a thil phal thu a sawi a. Mizoram sawrkar in central sawrkar duhsakna tam tak hi DPR te a hun taka siamfel a nih thin loh avangin kan dawng thin lova a pawi hle a ni a ti. Kan ram ah tunlai hian duhamna, eirukna, mahni hna a tui lohna leh thawklova sum hmuh tumna a tam ta hle a, heng te hi kan sim vat loh chuan hnam angin kan ding chhuak thei dawnlo a ni a ti a. Mitin hi kan awmna hmun leh kan hna vawn theuh a kan rinawm phawt chuan Pathian rawngbawl tu tha kan ni a ti. Rilru bakah taksa hriselna ngai pawimawh in taihmak leh thawhrim na kan intihhmuh a ngai a ni a ti.

132 KV Line Foundation Stone phumna Programme ah hian Pu R.Vanlalhruaia, CE, P&E chuan 132 KV Line thar hawn chung chang ah thu hmatawi sawina hun a nei a. He Line thar hi 132KV Line hlui chhimlam zawng zawng chawmtu hrui hlui tawh leh enkawl hautak tak mai vanga harsatna thleng thin ti ziaawmtu tan te, Chhimlama sawrkar hmalak na project lian tam tak power supply petu atan te leh NLUP hmalakna ti phuisui tu atan te a rintlak dawn hle a ni a ti a. Lunglei P&E Department SE Pu L.Pachuau in lawmthusawina in hun hi a khar a ni.