Art and Culture Minister Pu PC Zoram Sangliana'n vawiin khan Tuikual North Branch YMA Library a hawng. Pu PC Zoram Sangliana chuan library tha leh changtllung tak Tuikual North Branch YMA ten an nei chu a lawmpui thu sawiin vengchhung mipui, thalai leh zirlai ten tangkai taka an hman a beisei thu a sawi a. Hmasawn zel tur chuan hriatna leh finna a pawimawh a, chumi nei thei tur chuan lehkha chhiar kawngah tan lak nasat a tul a ni, a ti. Minister chuan Mizoram chhungah library 72 sak tum anih thu tarlangin mipui ten tangkai taka an hmana, an tana malsawmna a nih ngei a beisei thu Minister chuan a sawi a ni.

Tuikual North Branch YMA Library hi kum 16.8.1994 khan din niin 1996-ah sorkarin a pawmpui a. Vengchhung mipui leh sorkar tanpuina a hma sawn zelin kumin hian library room thar sakna tur Raja Rammohan Roy Library Foundation (Ministry of Culture) Kolkata leh Art &Culture Department hnen atangin building sakna tur cheng nuai 6 hmuh a ni. Library hi 864 sqft a zau a ni a, lehkhabu 3033; periodical/journal/magazine 200, a vaiin 3233 a awm a ni.

Library hawnna inkhawm hi Tuikual North Branch YMA President Pu F Hmingthanzauva'n a kaihruai a, an Branch YMA Secretary Pu K Lalhmachhuana'n report a pe a. Mizoram State Librarian leh President, Mizoram State Library Association ni mek Pu C Lalramliana leh Tuikual North Local Council Chairman Pu H Lalramzauva ten thu sawiin an Branch YMA Asst. Secretary Pu CVL Rinchhana'n lawmthu sawiin hun hnung a khar a ni.