‘Getting to Zero’ tih thupui hmanga Khawvela AIDS do ni, World AIDS Day vawiina Vanapa Hall-a Mizoram State AIDS Control Society (MSACS) in a buatsaih chu Health Minister Pu Lalrinliana Sailo chuan khuallian niin a hmanpui. He inkhawm hi Pi Esther Lalruatkimi, Secretary, Health & Family Welfare Department leh Chairman, Executive Committee, MSACS chuan a kaihruai a ni.
Health Minister Pu Lalrinliana Sailo chuan AIDS dona kawngah leh a darh zel tur venna lamah MSACS, Kohhran hrang hrang te, tlawmngai pawl hrang hrang te thawhrimna chu a fakawm a, an hnathawh hi a sawt hle a ni, a ti a. HIV/AIDS hrik pai thenkhat ten huaisen taka hemi natna an vei dan chungchang vawiin programme a an sawichhuak leh AIDS darh zel tur venna lama zirtirna an pe thin chu ropui a tih thu a sawi bawk. HIV/AIDS hi natna ang chuan inven awl tak nia a hriat thu sawilangin awareness hi a pawimawh tiin Minister chuan AIDS awareness lamah football te, drama leh choir inelna buatsaih chuan rah tha a chhuah a ni a ti bawk.
Minister chuan suahsualna vang leh nun inhlei vanga ni lo, HIV/AIDS vei te an awm laiin mi tak chuan vanduaina avanga kai an awm thu a sawi a. HIV/AIDS hi Mizoram in hriatna lung ka hriat a ngai a ni tiin a vei ten enhranna leh endawngna an tawk thin hian hemi lamah zirtirna uar a tul zia a ti lang a ni a, hei hi kan mutan ber a ni, a ti a. Minister chuan AIDS dona lamah kum sawmhnih chuang, a bikin kum 2003 atanga tun thlenga sum sen cheng vaibelchhe 103 vel chu tam viau angin lang mahse a dona kawngah a sawt hle nia a hriat thu a sawi bawk.
Pu Lalrinliana Sailo chuan AIDS/HIV hrik pai ten Short Stay Home an mamawh thu sawi langin hemi lamah hian mipui ten rilru zau tak pu se a duh thu a sawi a. Sawrkar pawhin he natna vei te tan hamthatna – ration card (AAY), RSBY lamah te leh Free Bus Travel lamah te a duan thu a sawi. Minister hian damdawi zuar thenkhat ten an zawrh loh tur an zawrh thin avangin mi tam takin he natna hi an vei phah a ni tiin Health Department chuan hemi lamah hian tan an lak lehzual a ngaih thu a sawi bawk.
Pi Esther Lalruatkimi chuan kalkhawmte inlawmna thu a sawi a World AIDS Day tobul leh khawvel hmun hrang hranga he Ni hman dan te a tarlang a. Dr. Eric Zomawia, Project Director MSACS chuan Report tawi pein, Mizoramah 2004 – 05 atanga 2011 – 12 thleng thisen test te leh hemi atanga HIV hrik pai hmuhchhuah zat te, ART centre 3 a HIV Positive te din hmun leh MSACS hnuaia Prevention leh Care Support & Treatment lama an hnathawh tlangpui te a Report a hian a tarlang a. Pi Betty Lalthantluangi’n ruihhlo a in chiu thin te tan Tragetted Intervention an kalpui dan chungchangah presentation a pe a. Dr. Lalchhanhima Ralte, Grace Home, Durtlang in he natna vei te Care, Support & Treatment (CST) hmanga an enkawl dan a sawi bawk.
He hunah hian IDU/Ex-IDU (inchiu thin) leh he natna vei mi pahnih ve ve ten an chanchin sawina hun an nei bawk a, an thusawi hian kalhawmte rilru a hneh hle a. Dr. Zothankhuma Chhuakchhuak, Deputy Director, MSACS chuan lawmthu sawiin hun a khar a. Vawiin inkhawm ah hian Health Deaptment-a thawk te bakah school leh college hrang hranga zirlai thahnem tak an tel a ni.
MSACS tarlan danin October 1990 atanga October 2012 thleng hian thisen test tawh zat 210861 niin heng zinga 7500 chu HIV positive chu an ni a. Aids avanga thi hi mi 372 report a ni tawh bawk. Aizawl, Champhai leh Lungleiah kumin October thleng khan ART Centre ah te hian HIV positive inziak lut mi 5628 awmin an zingah hian mi 2841 ART la tawh awmin 1889 chuan ART an ei mek a ni.
