Nizan khan Tuikhuahtlang YMA Cultural Sub-Committee chuan sawm bikte nen ‘Tuikhuahtlang Cultural Nite’ an hmang a. An vengchhung thalai chawimawina hun an hmang bawk. Art and Culture Department Minister Pu P.C. Zoram Sangaliana chuan a hmanpui. Minister chuan, “Tuikhuahtlang YMA Cultural sub-committee ten hetiang zan bik kan hnam tana thil pawimawh an hmang leh an siam chu a finthlak a ti a. Hman atanga Mizo hnam tih dan tha leh vawn nun ngai, chhawmnun hi kan tih tur a ni” a ti bawk. “Hnam dangin bamboo dance an nei ve nual. Mahse he hnam lam ‘Cheraw’ (Bamboo dance neitu chu Mizote kan ni a, 2012 Guidness World record Book phek 99-na ah Mizo nula leh tlangvalte’n Cheraw an kan lai a chuang a ni” a ti.

Minister chuan, “Naga hovin an hnam nun vawn leh chawi san an tum thar a, chumi tur chuan khua bik an din a, Kuki chhungkua in an luah a, Mahse chu in neitu chu Mizo te an ni. Anni chuan hetiang in hi an nei ve lo, kan sorkar pawhin hetiang khua bik ‘Heritage Village’ siam tumin rilru a seng mek a ni” a ti bawk. He hunah hian Pu Vanneihtluanga pawhin hmanpuiin, Pu Vanneihtluanga chuan, “Maian bai thiam leh ei te, tuikang nghah te, thlanlaih te leh chhung inkhawmte hi a Mizo a ni” a ti a, “Mizoram-ah leh Mizo hnamah hian nuam ti takin awm ila, i hlim ang u..” a ti. Zaithiam Mami Varte leh Rebecca Lallawmsangi ten mipui kal khawmte zaiin an awi bawk a ni.

Tuikhuahtlang YMA chuan an veng thalai Gilbert Lalmuankima, Mizo zinga Air Traffic Controller hmasa ber te, Nl Zodinpuii Colney Mizoram University-a Psycho Dett. a Gold Medalist leh Tv. Ramdinsanga 2012-a MPSC Engineering-a ti tha te chu lawmpuina thilpek an pe bawk.