Ministry of Development of North Eastern Region (DoNER) changtu Union Minister of State Pu Paban Singh Ghatowar chuan vawiin khan Mualpuia Rajiv Gandhi Stadium sak mek leh Falkawn a State Referral Hospital a tlawh.

DoNER Minister chuan Mualpuia Rajiv Gandhi Stadium sak mek chu a hmuna enin hna kal dan tha a tih thu leh a hun takah an zawh ngei a beisei thu a sawi a, peihfel a nih hun chuan hmarchhak State zinga Stadium tha ber a ni ang, a ti. Union Minister hian Pitarte tlanga Indoor Stadium pawh tlawhin tha taka sak a ni chu lawmawm a tih thu a sawi bawk.

Falkawna State Referral Hospital pawh a hmunah tlawhin DoNER Minister hian tun thlenga Hospital a taka hman theih a la nilo chu pawi a tih thu a sawi a. Mipui ten a tangkai thei ang berin hmang thuai se a duh thu sawiin Hospital hi a taka hman a nih thuai theih nan sum mamawh engemawzat pek a inhuam thu leh Health Minister Pu Lalrinliana Sailo hnenah a tul anga bawhzuia Detailed Project Report thehlut tura a hriattir tawh thu a sawi. Pu Paban Singh Ghatowar chuan DoNER Ministry chu Finance Ministry in guidelines a siamsak hnuaia kal, hmarchhak State 8 enkawl tura tih an nih hrereng chungin an sum neih atanga Mizoram hmasawnna tura theihtawp chhuahpui a inhuam thu a sawi a. North Eastern Council Chairman ni bawk Pu Paban Singh Ghatowar-a hian Mizoram chu remna leh muanna Mizoramin a chawinun tlat avanga chhuanawm a tih thu leh duhsak tlak nia a hriatthu sawiin Arunachal Pradesh dawtah chuan hmarchhak State zinga NEC atanga sum hmu hnem ber an nih thu a tarlang bawk. Vawiin hi Mizorama Chanchintha thlenni champhaphak, Missionary Day a nih hriain Mizoram mipui te Union Minister hian chibai a buk nghal bawk a ni.

DoNER Minister hian chawhnu dar 12:30-ah I &PR Conference Hall-ah Press mite kawmna neiin tlai lamah Guwahati lam panin a thlawk chhuak nghal a ni.