Ni thum chhung awh tur Sustainable Mountain Summit Vawiin ruk (6) na, Mizoram University Auditorium-a neih mek chu nimin (21. 9.217) tlai khan DoNER Minister Dr. Jitendra Singh chuan telpuiin, India hmar leh hmarchhak state 11, tlangram a awmte, a bik takin India hmarchhak state te chu an chenna leilung a danglam zawk avangin an harsatna tawh pawh a danglam bik thin tih Sorkar laipuiin a hriatpui thu leh, heng harsatna hrang hrang avang hian hmasawnna hna thawh chak harsa thin mahse India ram state zawng zawng ah hmasawnna intluktlang a awm theih nan DoNER Ministry chuan ngawrh taka hna a thawh zel tur thu a sawi.
DoNER Minister chuan India hmarchhak state-te chu a mawiin boruak a nuam tih chu hai rual a nilo a, amahwrawhchu tunlai khawvel, internet-in kil tina cheng te a thlunzawm tawhna ah hian ram innghahna tur thalaite ah mahni state ei leh bar dinhmunah duh khawplohna leh hmasawnna chak zawk thlakhlehna a awm a ni, a ti a. Chumi avang chuan sorkarin tlangram a cheng thalaite hi ram chhung state dang thalaite rualpawl turin leh inel pha turin entrepreneurship leh skill development lanah hma a lak mek thu a sawi.
DoNER kaltlangin India hmarchhak state te leh India state dangte nen hnuk hnai zawk turin inkalpawhna leh inbiakpawhna te ti hmasawn in nasa taka hna thawh a nih thu Minister chuan a sawi a. Tourism bakah sumdawnna kawngah heng tlangram state-te hian potential tha tak an neihte haichhuah a tulzia sawiin, nakin lawkah chuan state dangten India hmarchhak a cheng te atanga zir tur leh entawn tur tam tak an nei tih an hriatchhuah tur thu leh, chutianga entawntlak ni tur chuan a chhunga cheng te pawhin hma an lak a beisei thu te, DoNER Ministry lamin a theihna apiangah puih a inhuam reng thu te Minister Jitendra Singh chuan a sawi a ni.
Summit-ah hian Sikkim MP (LS) Pu PD Rai, IMI (Integrated Mountain Initiative) Councillor ni bawk chuan thu sawiin, India hmarchhak tlangram a awm ten khuarel chhiat avanga harsatna hrang hrang an tawh thin chungchangah Sorkar laipui chuan awmze nei zawkin leh uluk taka zirchianna nen hmalak dan ngaihtuah thei se a duh thu a leh, IMI chu hman tangkai theih a nih reng thu a sawi a ni.
IMI President Pu Alemtemshi Jamir IAS (Rtd) chuan he hunah hian IMI din a nih dan leh Summit lo neih tawh dan te a sawi a ni. He programme-ah hian summit chhimtute zawhna hrang hrang DoNER Minister hian chhanna hun a nei a, Pu Lalbiakmawia Ngente, IMI Councillor leh Mizoram Sustainable Development Foundation President ni bawk chuan lawmthu sawiin hun a khar a ni.
