81/2023-2024

Aizawl, 12th April, 2023 : Vawiin chawhma khan sawrkar laipuia Ministry of Development of North Eastern Region (DoNER) enkawltu Minister of State Pu BL Verma hovin Mizoram chhunga DoNER ministry hnathawh chi hrang hrang thlirhona Chief Minister’s Conference Hall-ah neih a ni a. Chief Minister Pu Zoramthanga chuan telpuiin, Planning Vice-Chairman Pu H. Rammawi, Finance Principal Secretary Pu Vanlalchhuanga, Secretary to CM Pu K. Lalthawmmawia bakah DoNER Ministry hnuaia project khawih department aiawhte an tel a ni.

He hunah hian Pu Verma chuan India hmarchhak hmasawnna atan sawrkar laipuiin theihtawp a chhuah a, Prime Minister in a ngaih pawimawh avangin kumtin hmarchhak tihhmasawnna tur sum pawh tihpun zel a ni a ti a. Inkalpawhna kawng leh hmasawnna ruhrel lian tak tak siam zel a nih thu sawiin a tul angin hmalak belh zel a ni a ti bawk.

Chief Minister Pu Zoramthanga pawhin Mizorama DoNER ministry hnuaia hmalakna chi hrang hrangte chu tha taka tihhlawhtlin vek a nih tur thu sawiin, North East Road sector Development Scheme (NERSDS) hnuaia Mizoramin project pali a neih zinga 3 chu Mizoram PWD in an thawk tih sawiin BRO in project pakhat an chan chu tun thlengin bul an la tan theih loh avangin hmasawnna a tikhawtlai thei dawn niin a sawi a, Mizoram PWD kuta hlanchhawng mai turin Minister hnenah hian rawtna a siam a ni.

Tun dinhmunah Mizoram chhungah DoNER ministry project hrang hrang 76 kalpui mek a awm a, Planning & Programme Implementation department official ten powerpoint presentation hmangin report an pe bawk a ni.

Chief Minister Pu Zoramthanga leh Minister of State for DoNER Pu BL Verma te hi tukinah khan a hranpa a inkawmin tukthuan an kil dun a ni.