82/2023-2024

Tlabung the 12th April, 2023 - Vawiin khan Transport Department changtu Minister Pu TJ Lalnuntluanga chuan SEDP sum cheng nuai 270 senga ruahman Commercial Vehicle Terminal Building, Tlabung ah a hawng.

Hawnna inkhawm Pu Vanlalchhuanliana, DTO Lunglei kaihhruaiah Transport Minister Pu TJ Lalnuntluanga chuan Mizoram khaw pawimawh leh kan kawtchhuah hmasa Tlabung ah Commercial Vehicle Building tih hlawhtlin a ni chu lawmawm tiin Tlabung leh a chhehvel economy tih hmasawnna kawnga hmanraw pawimawh tak ala nih chhoh ngei a beisei thu a sawi a. Transport Department hmalaknain sawrkarin kan lui hmanga transport kalpui theih dan tur 'Inland Water Transport Project' lian tham tak a ruahman mek thu sawiin Central Sawrkar kaltlangin Khawthlangtuipui transport project atan cheng vaibelchhe 22.90 sanction fel tawh niin tender pawh tih fel tep a nih tawh thu sawiin he project kaltlang hian hmasawnna leh employment tam tak hmuh a ni dawn a ni, a ti a. Hemi bakah hian Tuichawng, Darzo to Chhimtuipui ah te Techno Feasibility Survey zawhfel tawh niin Mizoram hmun hrang hrangah Inland Water Transport hi lian tham taka kalpui zel tum a ni, a ti a.

A sawi zelnaah Transport Minister chuan Tlabung leh a chhehvel khuate sawrkarin a ngai pawimawh takzet a ni tiin sawrkar hmalaknaa hmasawnna thleng mek leh ruahmanna awm mekte - RD Block hawn thar, NH 302 laih mek, MRB Branch hawn thar, Commercial Vehicle Building thar, Border trade hmalakna, Inland Water Transport hmalaknate chhawr tangkaia hmasawnna tlo leh daih rei nei thei tura hma la turin mipuite a chah a. Kan State ala naupan ngaihtuahin hmasawnna lian tham tam tak kan nei tawh a ni tiin thangtharte pawh a eng zawnga thil thlir thiam tura kan kaihhruai a pawimawh takzet a ni tiin sawrkar hmalaknate tha taka lo tawiawma lo finchhuah thin turin mipuite a chah bawk a ni.

He huna khualzahawm Pu K.T. Beicho, IRAS, Principal Secretary, Transport Department pawhin thu sawiin Mizoram tana khaw pawimawh Tlabung khua in Commercial Vehicle Terminal Building thar an nei chu lawmawm a tih thu a sawi a. Khawvel history kan enin Civilization ropui tak tak te lui kam ah an in tan thin a ni tiin Inland Water Transport leh Indo-Bangladesh Border trade hmalaknate kaltlangin Tlabung chu sumdawnna hmunpui pawimawh tak ala ni chho leh zel dawn a ni, a ti a. Commercial Vehicle Terminal Building leh sawrkar ruhrel dang te mipuiten uluk taka lo enkawl pui turin mipuite a ngen bawk a ni.

West Tuipui bialtu MLA Pu Nihar Kanti Chakma pawhin thu sawiin vawiinah a bial chhunga hmasawnna ruhrel thar pawimawh tak hawn a ni thei ta chu lawmthu sawiin Tlabung leh a chhehvel khua mipuite tana hmasawnna tam tak thlentu anih ngei a beisei thu a sawi a ni.

Commercial Vehicle Building Terminal building hawnna inkhawm ah hian Transport Department official-te leh Lunglei District chhunga Department hrang hrang official-te, 163 Bn BSF hotute, tlawmngai pawl hrang hrang, khawtlang hruaitute leh mipui thahnem tak an tel a. Rev R. Lalnghakliana, BCM Tlabung Pastor bial chuan hunserh hmangin Pu R. Lalrammawia, Director, Tranaport Department in lawmthu sawina hun a hmang a ni.