83/2023-2024

Vawiin khan School Education Directorate Conference Hall-ah Adult Education-in model centre hrang hranga eizawnna kawnga thiam thil zirna Ramhlun South leh Chawnpui Veng Model Centre-a an buatsaih kharna hun hman a ni a. School Education Minister Pu Lalchhandama Ralte-in khuallian niin he hun hi a hmanpui.

Minister chuan he hunah hian thusawiin Adult Education-in skill development lamah huang an zauh a, an hlawhtlinna a lo lang chu lawmawm a tih thu leh zau zawka hma an lak zel a beisei thu a sawi. Zir chhuakte chu an hlawhtlin leh hlawhtlin loh anmahni kutah a awm dawn a, teirei peih ni tur te, taimakna leh tumruhna nei a, hmathlir fel tak nei turin a fuih a ni. Minister chuan ram hmasawnte hian Skill Development lamah lian takin hma an la tih sawiin Mizoram sorkar pawhin skill development-ah hian LESDE atangin lian takin hma a la mek a, India ram huap inelnaah te training tha pawh nei mumal lovin Mizo nula tlangval intir a, a titha pawlah an lang thei a, Gold medal late pawh an awm a, tunah hian kum 2024-a World Skill Competition-a tel turin Mizo nula-tlangval tirh tumin inbuatsaih leh mek a ni a ti. Minister chuan hmathlir fel tak neiin LESDE kalpui mek a ni a, entrepreneur-te tiphur tur Kawtchhuah programme te pawh buatsaih a ni a ti bawk. Minister chuan NEP 2020 hian skill development hi a ngai pawimawh a, school-ah pawh thiam thil zir nan kum khatah ni 10 chhung chu school bag keng lova hun hman tum a ni a, hemi mil hian School Calendar te pawh siam a ni a ti. Pathianin Mizote theihna tha tak a pek hi chawikan zel a pawimawh a ni a ti bawk.

Khualzahawm Dr Lalzirmawia Chhangte, Secretary, School Education pawhin thu sawiin ziak leh chhiarah hian tun dinhmunah chuan Mizoram hi India ramah pathumna a ni mek a; pakhatna Kerela, pahnihna Lakshadweep an ni tih a sawi. Skill development hian a tum chu mitin hi thiam thil neih tir a, chu thiamna chu sum lakluh nana hman tangkai hi a ni a ti a. thalai zingah sorkar hnathawh tum lo, mahni kea din tum an awm ta nual a, miin hriatna, thiamna leh taimakna a neih chuan kawng a awm tha ta hle a, mahni kea ding tura intahhriam hi a pawimawh ta hle a ni a ti.

Pi Ng. Fanchun, Dy Director, Adult Education chuan model centre an kalpui dan a report a. Adult Education-in eizawnna kawnga thiam thil zirna an buatsaih hi model centre hrang hrangah a ni a, Aizawl-ah chuan Chawnpui leh Ramhlun South model centre-ah te kalpui a ni a. Lawngtlai leh Mamit-ah te pawh hetiang thiam thil zirna hi buatsaih a ni bawk.

Heng centre hrang hrangah te hian thiam thil an zirte chu eizawnna leh Bank chhawr tangkai tura hriat leh thiam tur pawimawh chi hrang hrang te, Pickle leh Jam siam te, pangpar chin leh khawi te, chhang ur te, lu meh te, hotel/restaurant a thawh dan te, pheikhawk chhe siam leh nihliap chhe siam te an ni. Ramhlun South centre ah hian mi 34-in an zir a, 34 in an zir chhuak a, Chawnpui centre ah hian mi 53 in an zir a, 47 in an zir chhuak a ni. Lawngtlai centre-ah mi 45 in an zir a, 39 in an zir chhuak a, Mamit centre-ah 46 an zir a, an zir chhuak vek a ni. Centre 4 a zir te hi 178 an ni a, 166-in an zir chhuak a ni.

Vawiin training kharna hun Pu Lalsangliana Director School Education kaihhruaiah hian School Education Officer te, MBSE, SCERT leh LESDE officer te, Samagra Shiksha officer te, Ramhlun South leh Chawnpui model centre a zir chhuak te an tel a, zir chhuakte hian an hlawhtlinna te an sawi a, an thil siam chi hrang hrang lei theihin an phochhuak nghal a ni.