84/2023-2024

Lunglei the 12th April, 2023: Vawiin khan Lunglei District Level Socio-Economic Development Policy(SEDP) Committee chu an Chairman Lunglei Bawrhsap Pi Ramdinliani, IAS hovin DC Conference Hall, Lunglei ah an thukhawm. Thutkhawmna ah hian Pu Donny Lalruatsanga, Additional Deputy Commissioner, Pu Lalramenga, SDC, Line Department , Lunglei District Village Council Association leh Prominent Citizen te an tel a ni.

Chairman Pi Ramdinliani chuan member kalkhawmte lawmna thu sawiin SEDP chu District chhunga kuthnathawk tu tan eizawnna bultan nan leh eizawnna kalpui mekten hma an sawn zel nana an hman tur tanpuina pek a, Mizoram chhunga mimal leh chhungkua a tam thei ang ber dinhmun tha zawk a hlan kai tum a ni a ti a. SEDP dawng tawh leh dawng tur te chu line Department ten an hlawhtlin theih nan theitawp chhuah turin leh beneficiary te vil leh kaihhruai kawngah hma la turin a fuih a ni.

Lunglei District Level SEDP Committee chuan SEDP thawhhnihna hi Mizoram State E-Governance Society(MSeGS) te nena tangrualin online a kalpui tum a ni. Lunglei District ah pawh Assembly Constituency tinah chhungkaw 14,000 te SEDP thawh hnihna dawng tura thlan te chu online a kalpui tur a ni a. Village Level Committee in ni 14.4.2023 thleng beneficiary list District Level Committee a thehlut tura tih niin District Level SEDP Committee in an District theuva beneficiary list chu SEDP Executive Board ah ni 28.4.2023 a thehlut tura ruahman a ni.

Lunglei District ah hian Line Department  9 a awm a, chung te chu Agriculture, Horticulture, Animal Husbandary & Veterinary, Fisheries, Sericulture, Land Resource, Soil & Water Conservation, Commerce & Industries, UD&PA leh Tourism Department te an ni.