Ministry of Development of North East Region (DoNER) changtu Union Minister of State Pu Paban Singh Ghatowar chuan vawiin chawhma dar 11:50 khan Lengpui Airport a lo thleng a; airport-ah hian Finance Minister Pu H. Liansailova leh Art & Culture Minister Pu P.C. Zoram Sangliana bakah Aizawl DC leh senior officer-ten an lo dawngsawng a ni.

DoNER Minister Pu Ghatowar hovin Mizoram Chief Minister Pu Lal Thanhawla, Ministers, Parliamentary Secretaries, Commissioners & Secretaries leh Heads of Department ten Chief Minister’s Conference Hall-ah NLCPR leh NEC Project chungchangah Review Meeting pawimawh tak an nei zui nghal a. He meeting-ah hian Mizoram atanga project kalpui mek leh harsatna eng eng emaw avanga project sanction tawh, zawhfel theih loh te chipchiar takin sawiho a ni.

Mizoram Chief Minister Pu Lal Thanhawla chuan DoNER hnuaia state ten project an thehluh awlsam zawka bawhzui a nih theih nan Project Sanctioning Committee-ah state tin atanga aiawh pakhat tal tel turin a ngen a; Project Sanction Order chu State Planning Departement leh project kaihhnawih department te hnenah pek tel thei ni se a duh thu a sawi a ni. Mizoram-in Sainik School a neih theihna tura project thehluh te, Medical College/Referral Hospital din nana project te, Tuirial Hydel Power project te tana sanction tihfel thuai sak turin a ngen bawk a. Aizawl-ah Auditorium emaw Convention Centre changtlung tak sak nana sum mamawh thu a hrilh chu DoNER Minister-in tihhlawhtlin sak a nih ngei tur thu a hrilh a ni. Chief Minister chuan Mizoram state-in DoNER atanga duhsakna leh thlawpna tha tak a hmuh zel avangin lawmthu a sawi a, Arunachal Pradesh (Rs.84 crores) tih lovah chuan Mizoram hi NLCPR hnuaia project sanction hmu tam ber (Rs.59 crores) a nih chungchangah lawmthu a hrilh bawk a ni.

DoNER Minister of State Pu Ghatowar pawhin thu sawiin Mizoram sorkar leh mipuite kumthar chibai duhawm tak a buk hmasa a, DoNER-in Mizoram sorkar atangin thlawpna tha tak a hmu zel avangin thawhhona tha tak an nei thei chu a lawmawm a ni, a ti. DoNER Minister a nih hnuah hmarchhak state zawng zawng te tlawh kualin DoNER hnuaia project kal mek te enthlithlaia, harsatna an tawh ang angte a sawipui thin thu sawiin Pu Ghatowar chuan an ngaihmawh ber chu project sanction tawh reng rengte a hun taka zawhfel ngei ni thei se tih a ni, tih a sawi. Mizoram District 8-ah mi harsa zawkte eizawnna ngelnghet an neih theih nana ‘livelihood project’ an duan sak tur chu Mizo mipuiten an chhawr tangkai ngei a beisei thu leh District hranga hranga awmten an awmna khua ngeia eizawnna tlak an nei theih a beisei thu a sawi bawk a ni. Mizoram chu kum 20 chhung zet rambuai kaltlang chung pawha lehkha ziak leh chhiar tamna state a nih avang leh Mizote chu hnam taima leh hmasawn chak an nih bawk avangin a bik taka duhsak tlak a ni, a ti a. Mizoram Civil Hospital-ah CT Scan mamawh a nih thu hriain DoNER Minister hian hemi atan sanction an rawn pek tur thu pawh vawiin meeting-ah hian a hrilh a ni.

Minister ruala lo kal DoNER Jt. Secretary Pu P.K. Patnaik chuan NLCPR hnuaiah Mizoramin project 48 a hmuh tawh mahse hun taka an zawhfel tak si lote sawi chhuakin, heng project zawh nana harsatna tawh hrang hrangte chipchiar taka sawihovin, a hma thei ang bera zawhfel theih nana tanlak dan tur pawh sawiho a ni.

Meeting zawhah DoNER Minister hian Chief Minister Pu Lal Thanhawla nen inkawmfalna hun an nei a ni. Minister hi Aizawl-ah zanin riakin naktukah Delhi panin a thlawk haw dawn a ni.