320/2023-2024

Aizawl the 4th May, 2023: Vawiin khan DoNER Secretary Pu Lok Ranjan chuan Govt. Hrangbana College-a tlawh a, Golden Hall-ah zirlaite nen inkawmhona an nei.

Pu Lok Ranjan chuan Govt. Hrangbana College-ten duhsak taka an sawmnaah lawmthu a sawi a, zirlaite chu nakina ram hruaitu tur an nih angin an zinga hun hman chu hlawkthlak tak a ni a ti a. Mizoram mai nilo, India leh khawvel huapa hruaitu tha nih tum turin a fuih. Mizoramin India rama literacy rate nei sang ber pahnihna a hauh chu lawmawm a tih thu tarlangin literacy rate neih san ringawt chu tawk lova, a taka eizawnna tlak thiamna zirchhuak tura theihtawp chhuah zel turin zirlaite a fuih bawk a ni.

Zirlaite nen an inkawmnaah Pu Lok Ranjan chuan zirlaite zawhna hrang hrang a chhang a. Zirlaiten harsatna paltlang tura thil pawimawh an zawhna chu Pu Lok Ranjan chuan engkimah ‘ka ti ve thei a ni’ tih rilru pu a, mahni inrin tawkna nen harsatna hmachhawn a ngai a, beidawng lova beih a ngai fo a ni a ti. Harsatna tam tak hi mahni maia paltlang theih loh, amaherawhchu thawhhona tha nena awlsam zawka paltlang theih a awm bawk thu sawiin midang thawhpui theih tura mahni insiamrem a ngaih chang a awm fova, midang thawhpui thiam a pawimawh hle a ni, a ti. Hmarchhak state-te hmasawnna tura thil pawimawh enge tih zawhna chhangin DoNER Secretary chuan state tinten mahni ram leilung hausakna mila hmalak thiam a ngai a, project siam kawngah pawh state-in a mamawh hmasakte thliar thiam a ngai a ni tiin hemi kawnga tanpui tur hian Ministry of DoNER chu engtiklai pawhin state-te tanpui turin a inhawng reng a ni a ti bawk. Hmarchhak state-te chu saptawng thiam tamna an nih angin, state leh rampawn lama hnathawk thei tura hmathlir nei turin a fuih bawk.

Pu Lok Ranjan, Secretary, Ministry of DoNER chuan Mizorama college pathum - Govt. Hrangbana College, Govt. Aizawl West College leh Govt. J Buana College building thar atana proposal thehluh pawh Ministry lamin an hmuh tawh thu leh tihhlawhtlin sak ngei a nih tur thu a sawi bawk.

Pu Lalmalsawma Pachuau, Secretary, Planning & Programme Implementation Department chuan ‘Localization of SDG & Sambhav Mizoram’ kalpui a nih dan leh 'SDG Symposium' chu Mizoramah Ni 28 March, 2023 khan hlawhtling taka buatsaih a lo nih tawh thu a tarlang a. Pi Zopuii Khiangte, Consultant, SDG Coordination Centre leh SDG Symposium 2023-a lawmman dawngtu Govt. Hrangbana College leh Mizoram Christian College-te atangin presentation neih a ni bawk.

Vawiin programme-ah hian Dr. H. Lalzidinga, Principal, Govt. Hrangbana College chuan an college dinhmun tlangpui a tarlang a. Pi Esther Lalruatkimi, Secretary, Higher & Technical Education Department chuan keynote address sawiin hun hnung chu Pi Sangchin Chinzah, Director (H&TE)-in lawmthu sawina nen a khar a ni.