321/2023-2024

New Delhi-a cham mek Mizoram Rajya Sabha MP Pu K.Vanlalvena chuan vawiin chhun khan Union Home Minister Pu Amit Shah a hnenah leh Union Home Secretary Pu Ajay Kumar Bhalla IAS hnenah Manipura buaina thleng mek ching fel tura ngenna a thlen.

Pu K.Vanlalvena chuan Manipura Mizo hnahthlak hnam hrang hrang ten kum tamtak kal tawh atanga vawiin ni thlenga an luah ram chu Manipur sawrkarin Forest Reserved atana a puan thar avanga heng buaina hi thleng a nih thu Home minister hnenah hian a thlen a. Manipur sawrkar hmalakna hi Central sawrkarin a tih tawp thuai a tul thu leh tihtawp a nih loh chuan North East state hrang hrangah he buaina hi a kangkai thei tih Rajya Sabha Pu K.Vanlalvena chuan a tarlang bawk a.

Mizoram chhungah state dang atanga lehkhazir leh hnathawka awm mek te Manipuri(Meitei) te tiamin thlamuang taka an chen theih laiin Mizo hnahthlak hnam hrang hrang te chu Manipur state chhungah thlaphang takin an awm mek a. Heihi titawp turin Central sawrkar hi a rang thei ang bera inrawlh a tul a ni tih Pu K.Vanlalvena chuan a sawi bawk a ni.