2954/2025-2026

Dated Serchhip, the 16th January, 2025: Vawiin khan Ministry of Development of North Eastern Region (DoNER) Secretary Pu Chanchal Kumar chuan Serchhip tlawhin Kawlri tlanga Cultural Heritage Centre sak mek a tlawh.

Kawlri Tlanga Cultural Heritage Centre sak mek hi Mizoram Chief Minister Pu Lalduhoma, Serchhip bialtu MLA ni bawk hmalaknaa sak niin North Eastern Council (NEC) hnuaia sum hmuh hmanga sak a ni a. September 2024 khan kuthhlak tan niin kumin kum bul lama zawh hman tura duan a ni a. He Project atana sum dah chu cheng vaibelchhe 4.31 niin PWD hnuaiah Excell Consultancy Services chuan an thawk a. Vawiin thleng hian za zelah 65 thawh zawh tawh a ni.

DoNER Secretary hian a hmunhma chipchiar taka fangin contractor chu a rang thei ang bera hna thawk zo turin a hrilh a. Ministry atangin funding ah harsatna a awm loh thu a sawi. Tangkai zawka hman a nih theih nan leh mipuite pawhin an hlut zual theih nan trekking route siam dan tur ruahman tel ni se tiin rawtna a siam bawk.

Kawlri Tlang hi Zoluti lak let lehna hmun niin Serchhip Heritage Society chuan Mizo History vawn nunna tur te, zin mite hip nan leh a hmunhmaa khuanu thil siam thing leh mau te vawnhimna ni pahfawmin he hmun hi chei a nih theih nan hun rei tak hma an lo la tawh a. Bialtu MLA hmalaknain hna hi kalpui a ni ta a. A bul lawkah hian Chawngpuii Khawthlir leh Pastor Chhawna Tawngtaina In siam a lo ni tawh bawk a ni.

DoNER Minister hi UD&PA Secretary Pu Lalmalsawma, Serchhip DC Pu Paul L Khuma, Additional DC Pu Lalrinzuala leh mi pawimawh dang ten an tawiawm a ni.

DoNER Secretary hian vawiin vek khan Thenzawla Helipad and Heliport siamna tur te, Thenzawl Peace City Greenfield Development siamna tur te leh Thenzawl Venghluna Handloom Cluster te a tlawh bawk a ni.