2953/2025-2026

Lawngtlai, 16th January 2026 : Vawiin khan Lawngtlai Bawrhsap leh CADC Caretaker- ni mêk Pu Donny Lalruatsanga chuan Chakma Autonomous District Council ( CADC) Executive Secretary leh Officers -te CADC Conference Hall, Kamalanagarah meeting a neihpui.

Pu Donny Lalruatsanga chuan CADC-Exectutive Secretary Pu Pronit Bikash Chakma, leh Officers- dangte chungah lawmthu sawiin kum thar chibai a bukna a nei a. CADC Caretaker a nih chhungin tha taka kalpui a duh thu tarlangin, ADC - area ten malsawmna tam tak neiin, hmasawnna kawng hrang hrang thlentu a nih laiin hmansual a hlauhawm hle a, dik leh tangkai tak hmang thiam turin a chah a. CADC Official - te chu mipuite rawngbawlru an nihna hre reng tura chahin, mipuite chhawr tlak leh fak tlak taka an nun pawh fimkhur turin a chah a ni. Hun vawn that pawimawhna sawiin, a hun taka Office thleng leh bâng thin turin a fuih a ni. Bawrhsap chuan rinawmna nena hnathawh a pawimawh hle tiin, sawrkara nihna te mimal hlawk nana hman loh hi a tha hle a, mahni hlawha lungawi thiam turin a fuih a. Pu Donny Lalruatsanga chuan CADC Officers - te chu ram leh hnam hmasawnna tura theihtawp chhuaha thawk turin a sawm nghal bawk.

Thutkhawmah hian CADC - department hrang hrangten harsatna an neih te, Staff recruitment, Muster Roll leh Provisional Employees chungchangte, CADC Budget chungchangte, Utilisation of Local Receipt, chungchang te sawiho a ni a. A tul angin thuneitu sang zawkah thlen leh se an ti a ni.

Pu Pronit Bikash Chakma, Executive Secretary CADC chuan CADC dinhmun tlangpui, department leh thawktu awmzat, leh hnathawh dan tlangpui report pekna a nei a. Pu Donny Lalruatsanga chuan kal khawmte hnena lawmthu sawina neiin hun a khar.