2657/2026-2027

Dated Champhai, the 13th October, 2026 : Ni hnih awh tura lo zin Pu Srinivas R. Katikithala, Secretary, Ministry of Development of North Eastern Region (DoNER), Govt of India chuan vawiin chawhnu khan Champhai a lo thleng a, Pu Nilambuj Sharan, Senior Economic Adviser, Ministry of DoNER, Govt of India pawh a tel a. DoNER Secretary hi Pi Ramdinliani, Secretary, Agriculture & Farmers’ Welfare Department leh Pi Maria CT Zuali, Secretary, Horticulture Department ten an tawiawm a ni.

DoNER Secretary Pu Srinivas R. Katikithala chuan Zotlang YMA Hall-a Sustainable Cultivation and Post Harvest Management of Mizo Ginger training neihah sawhthing chingtute nen inkawmna hun a hmang a. Mizo sawhthing that zia leh sawhthing chingtuten man tha zawk leh zau zawka an sawhthing thar an hralh theihna turin DoNER chuan Mizo Ginger Mission kaltlangin hma a lak mek thu a sawi a. DoNER Sr. Economic Adviser Pu Nilambuj Sharan pawhin he Mission hi a hlawhtlin ngei theihna turin DoNER leh state sawrkar chuan theihtawp an chhuah dawn tih a sawi. 

Hemi hnu hian DoNER hotute chuan Passion Fruit Processing Unit sak mek tlawhin, hnathawktute nen an inkawm a, khawl hnathawh dan te an endik bawk a. Passion Fruit Processing Unit hi North Eastern Council (NEC) fund hmanga sak niin, GeM portal hmanga thlan M/S Acufil ten khawl bun hna an thawk zo thawkhat tawh a, hawn theih a ni tep tawh a ni. 

DoNER Secretary chuan Hnahsin Kut-a stall hrang hrangte tlawh lehin, Hnahsin Kut Xplosion event a hmanpui bawk a. Hemi hnu hian Circuit House-ah DC Office huaihawtin cultural programme hman a ni a, sawrkar hotute nen inkawmin, chawhlui an kil ho nghal a ni.