2656/2026-2027

Dated Aizawl, the 13th October, 2026 : “North East Bankers Conclave 3.0” kharna chu vawiin khan Mizoram University Auditorium, Aizawlah Dr. Sukanta Majumdar, Union Minister of State, Ministry of Development of North Eastern Region (DoNER) chuan a hmanpui a, Conclave hlawhtling taka neih a ni chu lawmawm a tih thu a sawi.

Dr. Sukanta Majumdar chuan India hmarchhak state-te chu agriculture, tourism, entrepreneurship leh insfrastructure-ah te hma an sawn nasat thu sawiin State tinte theihna haichhuah chu thil pawimawh tak a nih thu a sawi a. Chumi thlentir thei tura sawrkar, bank leh financial institution hrang hrangte inhmuhkhawmna hmunpui pawimawh tak mai buatsaih a ni chu lawmawm a tih thu sawiin he Conclave hian thawh hona tha zawk a siam a beisei thu a sawi a ni.

New Delhi-a North East Bankers' Conclave (NEBC) hmasa ber neih a nih khan MSME, start-up leh agriculture sector-te tana credit tihthat a nih theih dan turte bakah Central leh State Scheme-te rang zawka kalpui a nih theih dan turte rel ho a nih thu sawiin NEBC 2.0, Agartala-a neih a nih khan bank branch leh ATM hawn belh dan turte, bank nei lo khua-a bank hawn a nih theih dan tur leh thil dang hrang hrangte rel ho a nih tawh thu a sawi a. Heng Conlcave pahnih hnu hian hmasawnna hrang hrang hmuh tur a awm tawh thu sawiin bank thar 131 hawn a nih bakah ATM 126 hun thar a nih tawh thu leh bank nei ngai lo khua 6905-ah te bank hawn a nih tak thu a sawi bawk.

Hemi a nih rual hian khua 2574 ngawtah bank hawn a la nih loh thu sawiin hengte hi kalkawng harsatna avanga-te, VSAT leh fibre connectivity that tawk loh avang-te bakah building mumal awm loh avangte a nih thu a sawi a. Hei bakah hian Manipur leh Assam tih lovah chuan India hmarchhak state dangte chu India ram average, 79.5% aia an Credit-Deposit ratio a tlem vek chu veiawm a tih thu a sawi.

North-East India tihhmasawn chu Sawrkar Laipuiin a ngaihpawimawh thu sawiin Ministry of DoNER chuan Prime Minister's Development Initiative for North East Region (PM-DevINE), North East Special Infrastructure Development Scheme (NESIDS) leh North Eastern Council (NEC) atangin North-East State-te tan project hrang hrang a siam thin thu a sawi a. Mizoram tan pawhin September ni 30,2026 thleng khan heng scheme atangte hian cheng vbc 1340 hu project siam a nih tawh thu a sawi a ni.

Union MoS chuan hmasawnna tur kawng hrang hrang siam ni thin mah se a hlawhtlinna tak tak hmu tur chuan thawhhona tha a pawimawh thu sawiin State hrang hrang sawrkar aiawha lo kalte, Bank leh Central lam aiawha lo kalte chu he Conclave-a thurelte tihlawhtlinpuiah a sawm a. Tihhtur hmachhawp insiam teuh ai chuan hmuh theiha rahchhuah neih a pawimawh zawk thu sawiin he Conclave hi Mizoram bakah North-East State zawng zawngte tan hmasawnna kawng hawngtu a nih ngei a beisei thu a sawi a ni.

He hunah hian topic hrang hrang pali - Banking Infrastructure & Financial Inclusion, Credit Flow to MSMEs & Entreprenuers, Financing of Agriculture & Allied Activities and Rural Entreprenuers leh Infrastructure Finance in the NER hmangin sawihona neih niin presentation pek a ni a, Pu PVSLN Murty, Chairman and Managing Director (CMD), North Eastern Development Finance Corporation Ltd. (NEDFi) chuan lawmthu sawiin Conclave hi a khar a ni.