2655/2026-2027

Dated Serchhip, the 13^th October, 2026: Nimin ni 12 October, 2026 khan SASCI Part-V (2025-2026) hnuaia Serchhip khawchhung kawngpui thawmthat hna thawh mek “Resurfacing of Old National Highway Road at Serchhip” chu District Magistrate din, Joint Inspection Team ten an endik.

PWD Serchhip Division te chuan, Bilzel pheia kawng khuar hnawh (pothole filling) hna chu Ram Pum Huap Kohhran Pavalai Pawl Inthawhkhawm Serchhip-a neih tur atan lirthei tlante tana a hrehawm lohna turin, temporary-a siam remna mai a nih thu an an sawi a; blacktop phah tak tak dawn hunah chuan heng temporary-a hnawhnate hi lak chhuah leh veka, hmanraw tha zawk hmanga hnawh that leh vek a nih tur thu an sawi.

Inspection team te hian Kikawn leh Sailiam inkar kawng pawh an endik nghal a; tun dinhmunah Side Drain siam hna hi za zela 96 zawh a ni tawh a, Kikawn kawng laih zauh hna pawh, metre 350 a thui zawh fel tawh a ni tawh bawk a; Fur laia leiminte pawh thenfai zel niin, retaining wall leh breast wall thenkhat siam hmabak a la awm bawk a ni.

Khawchhung kawngpui blacktop phah hna hi November thla atanga tan tura ruahman niin, Contract Agreement angin March ni 27, 2027 ral hmaa zawh fel tura tih a ni a, PWD hotute chuan an hnathawh that dan azir zela contractor te hnena pawisa pek chhuah thin a nih thu an tarlang bawk.

Inspection Team hi Addl. DC Pi Dorothy Muansangi'n hovin, Serchhip Town VC Association, District VC Association leh Sub-Hqrs YMA Serchhip aiawhte, PWD Serchhip Division atangin Pu PC Zokhuma, Sr. EE, Pu Lalrinhlua Ralte, SDO leh official dangte bakah Contractor aiawhin Pu PR Sharma, General Manager, Urban Infraprojects Pvt. Ltd leh Project Manager te an tel a ni.