2654/2026-2027

Aizawl dated 13th October 2026: Kumin January leh August inkar khan khualzin nuai 6.7 in Mizoram an tlawh a, kum dang nena khaikhinin 51% zetin an pung niin Tourism Minister Pu Lalnghinglova Hmar chuan vawiin tlaia Aijal Club-a Press Conference-ah a sawi. Kum 2024 leh 2025 inkar chhungin Mizoramah khualzin lo lut 97% zetin an pung niin Minister chuan a sawi a. A bik takin Bairabi-Sairang Rel kawng hawn a nih atangin khualzin punna hi a nasa hle a ni, a ti.

Winter Festival 2026, December 15-23 chhunga Lammual, Aizawla neih tur chungchang sawiin Tourism Minister chuan he festival hi Mizoram Sawrkar Tourism Deparment hmalakna pui ber tur zinga mi a ni, a ti a. Cultural programme hrang hrang bakah food leh craft fair te, community leh agro based tourism te an kalpui uar dawn a. December 23 a Christmas Parade neih tur pawh tualchhung leh state pawn atanga lo kal khualzin mite hipna tur pawimawh ber te zinga mi a ni dawn, a ti.

Pu Lalnghinglova Hmar chuan tourism kaihhnawih hmachhawp hrang hrang te sawiin chung zingah chuan November 11-13 chhunga neih tur Leitlangpui Music Festival te, Phuaibuang Tlaizawng Paradise December 17-18 chhunga neih tur te, December 31 a Sakawrhmuituai Sunset leh January 2, 2027 a Darzo khuaa neih tur “Chepa Nunchan” tih te a tel a. Heng kut leh hunpui hrang hrang lo awm tur chhim tur hian tualchhung leh ram pawn khualzin mite a sawm a ni.

Kum 2023 atang khan Mizoramah cheng vaibelchhe 680 hu zet tourism investment a awm tawh a, hetah hian project liantham khawihna cheng vaibelchhe zaruk chuang a tel a ni, Minister chuan a ti a. SASCI 2026-2027 hnuaiah project 5 thawhna tur cheng vaibelchhe 19.90 pawm tawh a ni a, CSR atanga thawh tur project pahnih, cheng vaibelchhe 6.50 senna tur ruahman a ni, a ti.

Tourism Adopted Villages Initiative kaltlangin community-based tourism lamah hmalak a ni bawk a. Tourism enterprise te tana tanpuina leh homestay din kawngah hmalak a ni a. Bana Kaih Scheme leh PM-JUGA kaltlangin homestay 199 siam niin thalai 124 te tan tourist guide training buatsaih a lo ni tawh a ni.

Mizoram Tourism hmathlir tarlan niin kum 2030 ah chuan kum tin tourist nuai 12, kum 2047 ah phei chuan tourist nuai 20 chuangin Mizoram an tlawh thei tawh tura beisei a ni a. Khualzinte thlenna tur tha zawk te; Culture, Adventure leh Nature tourism changtlung zawk leh Mizoram mipuiten tourism kaltlanga ei leh bar zawnna tha zawk an neih theih dan tur ruahmanna te chu an hmachhawp zingah a tel a ni.

Mizoram tlawh tumte chu sawrkar hriatpui tour operator, travel agent leh tour guide license nei te be pawp turin Minsiter hian a ngen a. Website mizoramtourism.com atangin awlsam taka hmuh theih a ni, a ti. State pawn lam mi khualzin te tan ILP Portal atangin Inner Line Permit dil theih a nih thu leh foreigner te tan e-FRRO kaltlangin Protected Area Permit dil theih a nih thu Minister chuan a sawi bawk.