2653/2026-2027

Kolasib, 13th October, 2026: Vawiin chawhnu  khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin 'Conservation and Restoration of the Catchment Area of the Barak River' project kalpui dan tur chungchangah thutkhawm a ni.

Thutkhawm kaihruaitu Bawrhsap Pu H. Dolianbuaia chuan he project pawimawhna hi sawiin, ramngaw leh nungchate humhalh leh siamthat te, tuihna humhalh leh chhiatrupna leh tuilian laka invenna te leh mipuite eizawnna ti hmasawn tur  project a awm chu a lawmawm in a pawimawh  takzet a ni, a ti. He project hlawhtling taka kalpui a nih theih nan department kaihhnawihte chu theih tawp chhuaha tangrual leh thawk ho turin a chah bawk.

He hunah hian he project thlithlai leh endik tura ruat (Interdisciplinary Team), GFA Consulting Group atanga Kolasib rawn tlawhtu mikhualte—Pu Jan Sass (Study Coordinator), Dr. Sumana Das leh Dr. Rajesh Kumar ten PowerPoint Presentation hmangin project kalphung tur leh an hmalakna turte an sawifiah a.

He Externally Aided Project (EAP) hi MDoNER leh NEC te buatsaih niin, German atanga sum hmuh (100 million EUR loan leh 8 million EUR grant) hmanga kum 8 chhung kalpui tur a ni.

Barak River catchment area huam chhung—Assam, Manipur, Nagaland leh Mizoram-a district 17-a khaw 560 te a huam dawn a. Mizoram atang chuan Kolasib district telin district 6 (Aizawl, Champhai, Mamit, Lunglei leh Serchhip) thlan an ni a.Project hmalakna tur langsar zualte chu—ramngaw leh nungchate humhalh leh siamthat (ecological restoration), tuihna humhalh, chhiatrupna leh tuilian laka inven (disaster risk reduction & flood control), mipuite eizawnna tihhmasawn (livelihood development) leh sik leh sa inthlak danglam laka inpuahchah (climate resilience) te a ni.

He hmalakna hian khaw 560 atanga mipui nuai 1.40 chuang eizawnna kawngah hmasawnna a thlen beisei a ni.

Vawiin thutkhawmah hian he project kaihhnawih sorkar department hrang hrang hotute an tel kim hle a. DRDO, Irrigation & Water Resources, PHE, P&E, Forest, Education, Agriculture, Horticulture, AH & Vety, Fisheries, BDOs (Thingdawl leh Bilkhawthlir), I&PR, DCIO, Revenue, UD&PA leh Economics & Statistics department atangin official-te an tel a ni.