Vawiin khan Mizoram Chief Secretary Pu Lalnunmawia Chuaungo chuan Chief Secretary Conference Hall, Aizawlah Department of Personnel and Administrative Reforms (DP&AR) buatsaih Voter Awareness Forum a hawng. 

Chief Secretary chuan democracy rama khua leh tui te chanvo ropui leh hlu tak chu vote thlak theihna chanvo kan neih hi a ni, a ti a. Ram thenkhatah chuan hmeichhia te vote thlak phalsak an la ni lo a, chutihlaiin India ramah chuan khua leh tui kum tling tawh phawt chuan vote thlak theihna chanvo kan nei a, he chanvo hlutzia hi mipuiten an hriat thar leh a tul, a ti. Pu Lalnunmawia chuan vote thlak ni (polling day)-ah sawrkarin chawlh a puang thin a, hei hi vote nei zawng zawngin vote an thlak ngei theihna tura ruahmanna a ni a. Thil tih tur tul dang chhuanlam emaw, peihloh emaw avanga vote thlak loh mai pawi ti lo an awm thin a, hei hi a pawi hle tih sawiin Chief Secretary chuan vote nei zawng zawngte chuan khua leh tui kan nih anga kan mawhphurhna a nih hriain vote thlak ngei ngei turin mipuite a sawm a ni. 

DP&AR buatsaih Voter Awareness Forum-ah hian Pu Lalrinsanga, Joint Secretary, DP&AR (GSW) chu Chairman a ni a. Pu Lalrohlua, Under Secretary, DP&AR (GSW) chuan VAF chungchang sawi zauna hun a hmang a, Pu R.Lalthazuala, Nodal Officer, VAF leh Deputy Secretary, DP&AR (GSW) ni bawk chuan programme kharna hun a hmang a ni. 

Election Commission of India chuan VAF hi sawrkar department te, Government and Non-Government Organization leh Corporate-ah din turin a ti a. Systematic Voters' Education and Electoral Participation program kal zelah sawrkar hnathawkte leh mipui nawlpuiin vote thlak pawimawhzia an hriat theihna tur leh inthlana vote an thlak ngei theihna tura hma a lakna peng pawimawh tak a ni. VAF hi inthlanpui kan hmachhawn tur atan chauha buatsaih a ni lo a, kum tluana kalpui tur a ni.