3568/2023-2024

Aizawl, the 30th January, 2024: Vawiin chawhma dar 11:00 khan Mizoram Departmental Officers' Association (MDOA) chuan General Assembly-2024, a tum 13-na chu Taxation Department Auditorium, MINECO-ah an hmang. He hun hi DP&AR Minister Pu K. Sapdanga chuan khuallian ni a hmanpuiin MDOA member promotion hmu thar mi 32 te leh MDOA hruaitu hlui Pi R. Lalrodingi hnenah pawl hminga lawmpuina citation a hlan.

Khuallian DP&AR Minister Pu K. Sapdanga chuan Sawrkar tharin sum leh pai dinhmun siamrem a nih theih nan inrenchemna a kalpui nghal thu sawiin, Sawrkar thar lakluh ni a Chief Minister-in ni 100 chhunga hna thawh tur ngaihpawimawh zual point 14 a puanah inrenchem chu thupui bera neih a nih thu a sawi a. Inrenchemna kalpui turin Legislator atanga bultan chhoh a nih thu sawiin, MLA tin te'n car cheng nuai 10 man an dawn thin tih tawp atangin cheng nuai 400 hum a ni a, lirthei dawn thin chu a thar beisei lova a hmaa mi chhawm tlang nghal mai a nih thu a sawi bawk a. Ama enkawl Dan leh thupek kengkawhtu Home Department atanga bultanin Department dangte tana entawntlak ni tura inthuahfai hmalak a nih thu pawh sawiin, February thla chhunga a nih ang tur tak ni pha thei tura lungrual taka tanlak tlan a ni, a ti a. Department hrang hrangah inrenchemna leh Dan hnuaia hmalak a nih theih nana tanlak a nih thu a sawi bawk.

Pu K. Sapdanga chuan hun rei lote chhungin Sawrkar hnathawk zingah a tam zawk thil tha duh leh thahnemngai tak an awm ni a a hriat thu sawiin, Dan hnuaiah zel Sawrkar hnathawkte dinhmun leh hamthatnate bawhzui tum a ni, a ti a. Sawrkar pachhiat zia hretute theuh kan nih angin kan khawsak phung pawh kan siamrem thiam a ngai dawn a ni tiin, Sawrkar hnathawkte chu Dan lalna ram, hnathawhnaa rinawmna lantirna leh inrelbawlna tha siam a nih theih nana hotute tawiawmtu nih tum theuh turin a sawm a. Sawrkar kalsual tur venpui tur leh thurawn pek a tul chang pawha inthlahrung hauh lova pe zel turin a chah bawk a. Khua leh tuite tana ram tha, hlemhletna leh Dan lova thil tih awm lohna ram siam tura hmalak tlan a pawimawh thu pawh sawiin, tu leh fate tana chenna tlak ram nuam tak siam a nih theih nana thahnemngai taka thawhpuiah a sawm nghal bawk.

Thusawitu dang MDOA President Pu C. Vanlalchhuana chuan General Assembly hmang tura member thahnem tak an tel thei chu lawmawm tiin member-te lawmna thu a sawi a. Pawl member-te chu Sawrkar tibuaitu ni lova a tha zawnga kaihruai theitu nih tum theuh turin a chah a. Mahni thawhna Department-ah thahnemngai taka thawk tur leh Mizoram sawrkar leh mipuite'n an hlawkpui theih tur zawnga hma la turin a chah a. Ram leh hnam rawngbawl kawnga ngaihtuahna dik tak hmang theuh turin a sawm bawk.

Vawiin MDOA General Assembly hi Dr. JT Vanlalngheta, Sr. Vice President chuan kaihhruaiin Pi PB Lianthangpuii, Treasurer-in hunserh a hmang a. Pi Lalsangpuii, General Secretary hnen atangin report ngaihthlak a ni a, Pu Lalchuailova, Vice President-in lawmthu sawiin hun hman a khar a ni.

Chawhnuah an pawl President Pu C. Vanlalchhuana hovin rorel inkhawm neih a ni a. Kum 2024-2026 chhunga MDOA hruaitu tur Office Bearer 9, Returning Officer Pu Lalchuailova, Polling Officer Pu R. Zosiamliana leh Dr. JT Vanlalngheta te kaihhruaina hnuaiah thlan a ni.

Mizoram Departmental Officers' Association (MDOA) hi kum 1983 ah din niin, kum 2003 ah Sawrkar recognition hmuh a ni a. Tun dinhmunah an hnuaiah hian Department 31 atanga gazetted officer association member 500 chuang an awm a ni.